Од партијата сметаат дека какви било обиди за заплашување на граѓаните или членовите се јалови и неуспешни
Социјалдемократскиот сојуз на Македонија (СДСМ) го осудува вандалскиот чин што се случил синоќа, кога беа искршени стаклата на изборниот штаб на партијата во Градско.
Од СДСМ порачуваат дека овој насилнички инцидент е директен показател за „уплашеноста и нервозата“ на власта и нивниот страв од изборен пораз во општината.
„Кампањата и изборниот процес секојдневно се нарушува со некакви инциденти, провокации или злоупотреби на институциите кои наместо за граѓаните се ставени во функција на ДПМНЕ“,
се вели во соопштението од СДСМ.
Според СДСМ, бидејќи нема што да им понуди на граѓаните, ВМРО-ДПМНЕ прибегнува кон валкани методи и кршење на демократските стандарди. Од партијата велат дека какви било обиди за заплашување на граѓаните или членовите се јалови и неуспешни.
„Му порачуваме на ДПМНЕ дека никој не им се плаши. Ги повикуваме јавно, барем еднаш, истрчајте чиста изборна трка, без подметнувања, без инциденти“,
се додава во партиското соопштение.
Од Министерството за внатрешни работи и од министерот Панче Тошковски бараат да не ги штитат насилниците, туку веднаш да постапат, без партиски директиви и да го расчистат случајот до крај и сторителите да одговараат.
„СДСМ ќе продолжи достоинствено, мирно и храбро да ја води кампањата затоа што оваа борба е за нашата држава, за нашиот дом, за Македонија. Од народната волја бегање нема, а изборен пораз не се брани со камења, тоа досега требаше да го научите“,
велат од СДСМ.