Оттаму бараат Владата итно да ги објави фактурите и деталните сметки кои ги поседува, за да се утврди дали и кои вработени направиле десетици илјади евра сметка за храна
Социјалдемократскиот сојуз на Македонија (СДСМ) го оценува како шокантен одговорот од Владата дека сметките што претходно беа објавени од опозициската партија се од бифеата што функционираат во рамките на министерствата и се од услуги за кои плаќаат вработените, а не сметки за ручеци на министрите.
„Скандалозно лажење на Владата – ја префрла одговорноста на вработените, зар тие јаделе на државна сметка!?“,
се вели во денешното соопштение од СДСМ.
Според СДСМ, прашањето на кое треба да се одговори е колку вработени јаделе и пиеле на државна сметка или „станува збор само за министрите и кабинетите на министрите“.
„Дали покрај тие трошоци, министрите правеле и ручеци во рестораните кои ги снабдуваат бифињата во министерствата? Колкав е тој вкупен трошок?“,
се дел од прашањата што денеска ги поставуваат од СДСМ.
Оттаму бараат Владата итно да ги објави фактурите и деталните сметки кои ги поседува, за да се утврди дали и кои вработени направиле десетици илјади евра сметка за храна, или, пак, како што велат, овие трошоци се направени од министрите по кафеаните.
„ВМРО-ДПМНЕ целосно се одлепи од реалноста. Откако потрошија 35 илјади евра на манго и папаја, сега трошат по рестораните за ручеци и гозби. Ако се чесни – нека излезат во јавноста со детални сметки“,
велат од СДСМ.
Вчера од СДСМ, на прес-конференција, соопштија дека во првите четири месеци од годинава, владините функционери потрошиле над 30 илјади евра во скапите скопски ресторани. Посочија и дека гозби, ручеци и вечери плаќале речиси сите министри.
Како што рече портпаролката на СДСМ, Богданка Кузеска, сметките се запрепастувачки и се јавно достапни на „Отворени финансии“.
Подоцна од Владата стигна одговор во кој велат дека трошоците за ручеци што ги прикажуваат од Социјалдемократскиот сојуз (СДСМ) како наводни трошоци на министрите, се всушност сметки од бифеата што функционираат во рамките на министерствата, а чии услуги ги користат и плаќаат и вработените во тие установи.