Според пријавата доставена до Антикорупцискиот тим преку платформата „МИЦКО.мк“, постои основано сомнение дека месечно се испумпуваат околу 25 000 евра, односно 300 000 евра годишно
Нови детали за сомнителниот тендер во АД „Пошта“ тежок 1,2 милиони евра денеска објави генералниот секретар на Социјалдемократскиот сојуз на Македонија (СДСМ), Александар Саша Димитријевиќ. Тој на прес-конференција презентираше наводи од „свиркач“ – вработен во „Пошта“, кој тврди дека преку фирмата „БС Клининг ДООЕЛ“ има организирана кражба на пари од граѓаните.
Според пријавата доставена до Антикорупцискиот тим преку платформата „МИЦКО.мк“, постои основано сомнение дека месечно се испумпуваат околу 25 000 евра, односно 300 000 евра годишно.
Според тендерот за хигиена, во сите 14 поштенски подружници мора да има по двајца хигиеничари, а во главната подружница „Пошта 2“ задолжително 10 лица.
Димитријевиќ рече дека свиркачот тврди оти во повеќето подружници работи само по едно лице и тоа со скратено работно време, додека во „Пошта 2“ недостасуваат речиси половина од работниците.
„И така, преку константен недостатокот на 14 хигиеничари, како и скратеното работно време на останатите кој реално работат, доаѓаме до пресметката за тоа колку пари месечно е загубата, ако се земе предвид дека за сите хигиеничари (и тие што не работат и тие што работат само неколку часа во денот) се плаќаат целосни износи, согласно спецификацијата и договорот склучен со претпријатието“,
рече Димитријевиќ.
Во пресметката што ја наведе Димитријевиќ, се вели дека месечниот трошок за еден хигиеничар е над 40 000 денари, што значи дека ако недостасуваат 14 хигиеничари, тоа се над 560 000 денари месечно.
„Постоечките 25-26 хигиеничари работат само 50 отсто од времето, тоа се нови 550 000 денари. Заедно со другите давачки уште 200 000 денари доаѓаме до речиси 25 000 евра месечно. Тоа се 300 000 евра годишно! Ете ја шемата, ете ја корупцијата“,
кажа Димитријевиќ.
Според писмото на вработениот во „Пошта“, од АКТ објаснуваат дека оваа злоупотреба наводно се прикрива со потпишување на лажни дневници за присутните и со лажни извештаи за генерални чистења, а вработените во „Пошта“ реагираат дека работат во супстандардни услови и нечистотија.
Од Антикорупцискиот тим потенцираат дека фирмата добитник на тендерот се поврзува со структури блиски до политичката партија ЗНАМ.
„Ги објавуваме сите наводи и бараме Јавното обвинителство веднаш да отвори истрага по допрен глас. Во чии џебови завршуваат испумпаните пари и кој ќе одговара“,
додаде Димитријевиќ.
АКТ најави дека продолжува со објавување на скандали поврзани со криминални тендери и повикува оти институциите мора да постапат.