Костовски упати барања до власта да ги прифати нивните предлози за зголемување на платите и мерките за намалување на цените
Организацискиот секретар на Социјалдемократскиот сојуз на Македонија (СДСМ), Мартин Костовски, смета дека има целосен дебакл на економските политики на Владата на ВМРО-ДПМНЕ и ЗНАМ и оти заради тоа граѓаните се соочуваат со континуирани ценовни шокови.
Костовски се повика на податоци од Сојузот на синдикати на Македонија (ССМ), според кои синдикалната кошничка поскапела за над 1 200 денари само за еден месец, при што трошоците за храна и пијалоци се зголемиле за 954 денари.
„За едно четиричлено семејство потребни се речиси 63 000 денари месечно само за да преживее. Основните намирници стануваат луксуз, а платите не мрдаат. Три минимални плати се потребни за да може да се преживее месецот“,
изјави Костовски на денешната прес-конференција.
СДСМ обвинува дека додека граѓаните тонат во сиромаштија и се задолжуваат за да преживеат, премиерот Мицкоски ги чека анализите за покачувањето на цените, а министрите во Владата живеат надвор од реалноста.
„Дали министрите во Владата знаат колку чини да се наполни еден фрижидер? Очигледно не – затоа што додека народот крпи крај со крај, функционерите на ВМРО-ДПМНЕ живеат надвор од реалноста, во свет на папаја, манго, октоподи“,
рече Костовски.
Тој додаде и дека ова не било доволно, па Службата за општи и заеднички работи (СОЗР) одлучила во април и мај да склучи милионски договор за нови луксузни јадења, вклучувајќи лигњи, школки и лосос.
„Ова што го прави Владата не е политика, ова е грабеж на народот!“,
кажа Костовски.
Костовски упати барања до власта да ги прифати нивните предлози за зголемување на платите и мерките за намалување на цените.
„Покачување на минималната плата на 500 евра, спроведување мерки за повисоки плати во јавниот и приватниот сектор, укинување на ДДВ за храна, со што веднаш би се намалиле цените на основните производи“,
се дел од предлозите што ги даде Костовски.
Тој заклучи дека СДСМ останува со граѓаните и ќе продолжи да се бори за поголеми плати, достоинствен живот и економија која служи на човекот, а не на партијата на власт.
Реакцијата на СДСМ доаѓа откако денеска Сојузот на синдикати на Македонија (ССМ) го објави износот на минималната синдикална кошничка за овој месец.
Според ССМ, за покривање на минималните трошоци на едно четиричлено семејство во мај годинава му се потребни 63 908 денари, што во споредба со минатиот месец, вредноста на синдикалната кошничка за мај е зголемена за 1 217 денари.