СДСМ: Се потврди дека Бојан Христовски има лажен сертификат

Од СДСМ ја повикуваат Антикорупциската комисија итно и во најкус рок да се изјасни и да ги потврди наодите на бугарските медиуми

Се потврди уште една информација за која СДСМ денови наназад ја информираше јавноста: поставувањето на Бојан Христовски за директор на АНБ, не само што е груба партизација туку е и целосно незаконска постапка, велат од СДСМ. Од опозициската партија посочуваат дека се потврдило оти сертификатот за англиски јазик на Христовски е лажен и дека центарот во Пловдив, Бугарија, каде што тој тврди дека го добил, не постои.

СДСМ тврди и дека Христовски нема ниту безбедносни сертификати ниту доволно работно искуство на раководни позиции, што е предуслов за назначување на позицијата директор.

„Сите овие законски прекршувања што ги прави Мицкоски со назначувањето на целосно некомпетентен човек, без соодветни квалификации, ја потврдуваат тезата за опасна партизација на АНБ. Од овие причини, потребно е итно повлекување на Бојан Христовски и започнување истрага за овој упад во АНБ кој го наметнува Мицкоски“,

се наведува во соопштението од СДСМ.

Од СДСМ ја повикуваат Антикорупциската комисија итно и во најкус рок да се изјасни и да ги потврди наодите на бугарските медиуми, првично објавени од СДСМ.

„Христовски не смее да остане на чело на АНБ и бараме достоинствено да се повлече“,

додаваат од СДСМ.

„Фактор.бг“: Новиот шеф на македонската тајна служба е со фиктивна диплома за англиски јазик, во Пловдив не постои такво јазично училиште

Вчера бугарски „Фактор“ објави дека на посочените адреси во Пловдив, каде што Христовски тврди дека го добил ТОЕФЛ-сертификатот, нема такво јазично училиште. Порано таму била сместена компанијата „Julia Co.LTD“, но сега канцеларијата е затворена и работи онлајн. Во телефонски разговор лицето, кое одговорило на бројот објавен во брошурата, посочило дека компанијата не издава сертификати за ТОЕФЛ и не врши обука за добивање таков сертификат.

„Проверката на интернет покажува дека нема официјална веб-страница или друга реклама на јазичното училиште ’Julia Co.LTD’, како што тврди Христовски. Пронајдена е само фејсбук-страница на консултантска куќа со слично име, која се занимава со посредување при работа во странство, подготовка на документи, преводи и легализација. Сепак, во огласениот леток на компанијата никаде не се споменува дека обезбедува обука и курсеви за странски јазици, како и подготовка или спроведување на тестови за ТОЕФЛ“,

пишува Фактор.бг.

Бојан Христовски за ТОЕФЛ-сертификатот за англиски: Полагав во Пловдив зашто беше најбрз начин да стигнам до диплома