Филипче посочи дека СДСМ дава целосна поддршка на барањата на Сојузот на синдикатите за минимална плата од 600 евра, оценувајќи дека работниците заслужуваат достоинствен живот, особено, како што рече, во услови кога синдикалната кошница надминува 65 000 денари
Пратеничката група на СДСМ и коалицијата денеска повторно го поднесе предлог-законот за измена на Законот за минимална плата, откако претходно бил вратен од претседателот на Собранието Африм Гаши поради, како што посочил, технички недостатоци.
Претседателот на СДСМ и пратеник Венко Филипче на денешната прес-конференција во Собранието изјави дека очекуваат законот да биде ставен на дневен ред во текот на месецов. Тој кажа дека во следниот период ќе се види дали постапката на враќање била направена со цел, како што вели, да се одложи неговото разгледување.
Филипче посочи дека СДСМ дава целосна поддршка на барањата на Сојузот на синдикатите за минимална плата од 600 евра, оценувајќи дека работниците заслужуваат достоинствен живот, особено, како што рече, во услови кога синдикалната кошница надминува 65 000 денари. Како можни извори на средства, тој ги посочи буџетските категории за патни трошоци и репрезентација, од кои, според него, може да се обезбедат средствата.
Тој повтори дека државата, според него, може да ги субвенционира придонесите за зголемените плати во приватниот сектор за да не се нарушела ликвидноста на компаниите.
Филипче упати критика до власта за најавите за купување нов владин авион, оценувајќи го тоа како расипништво во услови кога граѓаните протестираат за повисоки плати.
Пратеничката група на СДСМ ќе поднесе и измени на Законот за административни службеници. Според Филипче, измените што Владата ги направила претходно довеле до намалување на платите на службениците во Собранието за 30 проценти, што, како што оцени, ја компромитира независноста на Законодавниот дом. Тој побара поддршка од сите пратеници за да се врати претходното ниво на примања.
Инаку, Сојузот на синдикати на Македонија (ССМ) денеска го започна најавениот протест со блокада на зградата на Собранието. На две локации околу Собранието, едната на улицата „Даме Груев“ и другата на „11 Октомври“, имаше по 21 работник, кои со знамиња и свирежи го изразија своето незадоволство барајќи од пратениците минималната плата веднаш да се зголеми на 600 евра, а останатите плати да се зголемат за најмалку 6 000 денари или за разликата од зголемувањето на минималната плата (од сегашната минимална плата и новата минимална плата).
На почетокот на блокадата, претседателот на ССМ Слободан Трендафилов во изјава за медиумите, им посака добро утро на сите освен на пратениците. Тој порача дека денешниот протест на ССМ треба да ги засрами сите, особено 120 избрани пратеници кои, како што додаде, уште на денешната собраниска седница треба да предложат зголемување на минималната плата од 600 евра и зголемување на сите останати плати за најмалку 6 000 денари.