Денеска ќе биде втор ден од комисиската расправа за предлог-буџетот. Според роковите, Комисијата за финансирање и буџет може да расправа 10 дена – пет дена за општа и пет за амандманска расправа. За пленарна расправа, според Деловникот, одредени се пет дена
Во собраниската Комисија за финансирање и буџет денеска треба да продолжи расправата за предлог-буџетот за 2022 година.
Од владејачкиот СДСМ велат дека станува збор за предлог-буџет кој е насочен за зачувување на здравјето и животот на граѓаните, економско заздравување и забрзан раст и најавуваат дека заедно со останатите блокирани закони ќе ги донесат со зголемено парламентарно мнозинство.
„Имајќи ги предвид предизвиците што стојат пред државата и граѓаните како енергетска криза, пандемијата, продолжување на евроатлантскиот пат на земјата, секој пратеник треба да ја оправда довербата добиена на избори и да работи во интерес на граѓаните. Демократскиот блок, преку зголемено, стабилно парламентарно мнозинство предводено од СДСМ во периодот пред нас ќе ги донесе Буџетот и законите блокирани од опозицијата“,
велат од СДСМ.
Од ВМРО-ДПМНЕ, пак, предлог-буџетот го сметаат за нереален и неразвоен со многу непродуктивни трошоци и велат дека ќе следува ребаланс во првиот квартал од 2022 година, а најавија и дека ќе поднесат повеќе од 200 амандмани.
Денеска ќе биде втор ден од комисиската расправа за предлог-буџетот. Според роковите, Комисијата за финансирање и буџет може да расправа 10 дена – пет дена за општа и пет за амандманска расправа. За пленарна расправа, според Деловникот, одредени се пет дена. Буџетот треба да биде донесен до крајот на годината.