Иако беше конституиран на крајот на 2016 година, деветтиот собраниски состав почна да функционира дури од 27 април 2017 година, а од 16 февруари годинава е распуштен
Партискиот портпарол Костадинов предупредува дека државата е предолго без функционален парламент и дека никој не може да предвиди што ќе се случува наесен
Ако и натаму се оддолжува одржувањето на парламентарните избори, земјата може да се најде во ситуација да не може да го реализира гласањето ниту во последните редовни рокови во декември, предупреди денеска портпаролот на СДСМ, Костадин Костадинов.
Одговарајќи на прашање дали СДСМ е подготвен да оди на избори на 5 јули без согласност на ВМРО-ДПМНЕ, Костадинов рече дека ситуацијата во која се наоѓа државата не е закана само за здравјето на граѓаните, туку и за уставно-правниот поредок во државата.
„Секој што не сака да се соочи со таа реалност е неодговорен и не сака да го прифати фактот дека нашата земја трпи сериозни последици од тоа што предолго време сме без функционален парламент. Ние длабоко навлеговме во зоната на критични рокови, така што многу лесно може да се случи да немаме избори ниту во редовниот термин во декември. Никој не може да предвиди што може да се случи наесен. Оттука, прашањето дали ќе има избори на 5 јули не е прашање на политички преговори, натегања и исполнувања на нечии желби, туку уставна и законска обврска“,
рече Костадинов.
Тој нагласува дека носењето мерки за заштита на здравјето на граѓаните и за економијата може да биде обезбедено исклучиво со институции кои ќе имаат полн капацитет и легитимитет даден од граѓаните.
„Јас знам дека одржување избори во еден ваков период е предизвик, но верувам дека се единствена алатка во една функционална парламентарна демократија за надминување на проблемите со коишто се соочуваме. Оттука, заклучокот е дека изборите во овој период се единствено решение, а не проблем“,
рече Костадинов.
Собранискиот состав на заминување беше конституиран на 30 декември 2016 година, а изборите треба да се одржат во последните 90 дена од тој датум годинава, што значи дека редовните рокови за гласање би почнале да течат веќе од крајот на септември.
Иако беше конституиран на крајот на 2016 година, деветтиот собраниски состав почна да функционира дури од 27 април 2017 година, а од 16 февруари годинава е распуштен и оттогаш нема одржано седница.