Логично е прашањето – дали Мицкоски е тој што подготвува хаос на изборите, велат од СДСМ
Да имаше Мицкоски реални резултати по четири години локална власт и една година централна власт на ВМРО-ДПМНЕ, денеска ќе зборуваше за нив, тоа ќе му беше отчетот пред граѓаните, реагирaaт од СДСМ, по обвинувањата за „таен план“ за хаос на изборите. Од опозицијата обвинуваат дека премиерот Мицкоски „посегнува по измислени сценарија и конструкции“ околу локалните избори, бидејќи зад себе, како што велат, нема резултати.
„Со истата стара реторика на поделби по политичка и етничка линија, Мицкоски повторно се обидува да ја излаже јавноста, исто како пред парламентарните избори во 2024 година. Но, тоа веќе не поминува. Мицкоски и ВМРО-ДПМНЕ се прочитана книга и граѓаните нема да подлегнат на истите лаги и манипулации. Ваквите изјави на премиерот Мицкоски само потврдуваат дека власта е во паника поради падот на поддршката и стравот дека разочараноста и незадоволството на граѓаните ќе се пресликаат на резултатот од локалните избори. Логично е прашањето: дали токму Мицкоски е тој што подготвува хаос на изборите?“,
се наведува во реакцијата на СДСМ.
Премиерот Христијан Мицкоски на партиски настан на ВМРО-ДПМНЕ денеска кажа дека е време да се открие „вистината за влаканите игри кои се подготвуваат зад кулисите“. Според него, СДСМ и ДУИ имаат смислено и координирано сценарио за хаос, политичка магла и манипулации.
„Со инфлација од независни кандидатури и фантомски листи сакаат намерно да го урнат изборниот процес. Да го збунат гласачот и да ја изиграат демократијата и да ја заматат чистата слика на нивниот историски пораз што доаѓа. Но зад оваа игра не стојат само партиските штабови. Во таа намера длабоката држава на СДС и ДУИ и нивните луѓе распределни се во судството, изборната комисија и институциите. Тие денес се во коалиција за да го спречи поразот што ќе им го донесе ВМРО-ДПМНЕ и коалицијата на локалните избори“,
рече Мицкоски.
На изјавите на Мицкоски реагираа и од ДУИ, од каде што велат дека станува збор за опасни клевети и поттик за етнички судир.
„Наместо да измислува имагинарни непријатели, премиерот треба да објасни зошто неговата влада го крши Уставот, зошто ги дискриминира Албанците. Зошто, спротивно на Уставот и законот, го намали бројот на советници, зошто ја инструментализира ДИК, Уставниот суд и другите институции во служба на неговите партиски и моноетнички планови и зошто со секоја одлука ја враќа државата назад во времето пред 2001 година? ДУИ не може да остане рамнодушна кога се гази Охридскиот рамковен договор, кој е клучен за стабилноста на земјата и нејзината прогресивна иднина“,
порачаа од ДУИ.