Оваа редефиниција од ВМРО-ДПМНЕ, додаваат од СДСМ, има за цел да ги претстави мигрантите за кои веќе постои договор, само да не се нарекуваат мигранти
Планот на ВМРО-ДПМНЕ за примање мигранти во Македонија е целосно разоткриен, а потврда за тоа, според СДСМ, не се само пишувањата на британските и на светските медиуми.
Според СДСМ, ВМРО-ДПМНЕ и Христијан Мицкоски со иста техника, по моделот на Вучиќ со литиумот во Србија, сакаат да го спроведат проектот „мигранти за пари“ во Македонија. Планирано е овој потег да се реализира по изборите во јуни.
За тоа што содржи планот, од СДСМ велат дека вчера го најавил Антонио Милошоски, кој во интервју на национална телевизија изјави дека странските работници кои доаѓаат преку дозволи и агенции немаат никаква врска со азиланти и мигранти. Ова, како што се вели во соопштението од СДСМ, укажува дека ВМРО-ДПМНЕ статусот на мигрантите ќе го преименува во „економски работници“.
„Очигледно затоа им ветуваат работа и сместување, односно постојан престој“,
се додава во соопштението.
Оттаму спомнуваат изјава од премиерот Мицкоски, кој пред неколку дена употребил термин „нелегални“ мигранти. Тоа, како што велат од СДСМ, е така бидејќи овие ќе бидат претставени како „легални“.
Оваа редефиниција од ВМРО-ДПМНЕ, додаваат од СДСМ, има за цел да ги претстави мигрантите за кои веќе постои договор, само да не се нарекуваат мигранти.
„Затоа не ја потпишуваат резолуцијата“,
велат од СДСМ.
Инаку, СДСМ вчера ја објави резолуцијата што најавија дека ќе ја поднесат до Собранието. Во резолуцијата се наведени седум точки.
Првата точка е Собранието да констатира дека нема прифаќање депортирани лица од трети земји, како и лица за кои е утврдено дека нема правна основа да останат во трети земји. Како втора точка се наведува дека Северна Македонија нема да биде дел од договори каде финансиската помош или инвестициите се условени со преземање мигранти.
Со резолуцијата се бара и да се констатира дека државата нема капацитети и социјална кохезија односно дека земјата не располага со социјални, економски и безбедносни капацитети за да стане центар за процесирање на азил за потребите на други, далеку побогати држави.
Една од точките од резолуцијата е усогласеност со ЕУ, а не билатерални експерименти.
„Северна Македонија ќе ги следи и спроведува исклучиво заедничките политики на Европската Унија за миграција“,
се додава во Резолуцијата.
Во резолуцијата се бара и Собранието да ја задолжи Владата веднаш да ги прекине сите евентуални преговори од ваков тип и во рок од три дена да достави целосен извештај до пратениците за сите комуникации остварени со Владата на Обединетото Кралство или други субјекти на оваа тема.
СДСМ повикува и на единство, што го смета за натпартиско прашање и се однесува на иднината на државата. Сметаат дека Собранието треба да ги повика сите политички чинители да се обединат околу овој став „штитејќи го достоинството на македонските граѓани, но и угледот на државата како субјект кој почитува правила, а не територија за туѓи експерименти“.
На крајот од предлог-документот се наведува дека резолуцијата, доколку биде прифатена, ќе се објави во „Службениот весник на Република Северна Македонија“.