Опозиционерите побараа Антикорупциската комисија да отвори предмет, да ги истражи фактите и да обезбеди одговорност за случајот
Опозицискиот СДСМ денеска достави документи до Државната комисија за спречување на корупцијата (ДКСК) и побара антикорупционерите да постапат во врска со случајот со тендерската постапка за униформи за специјалните единици на Министерството за внатрешни работи.
„Денеска сме пред ДКСК да побараме итно постапување по овие сериозни сомнежи за корупција. Ќе предадеме документи. Да се истражи до крај, дали станува збор за местен тендер, однапред договорен? Чии интереси стојат зад овој тендер вреден 4 милиони евра?“,
рече портпаролката на СДСМ во изјавата пред просториите на Антикорупциската комисија.
Опозиционерите побараа ДКСК да отвори предмет, да ги истражи фактите и да обезбеди одговорност за случајот.
„Секој ден власта ја тресат корупциски скандали. Буквално смрди на корупција во врвот на власта. Последен е скандалозниот тендер во МВР од 4 милиони евра кој го добива и фирма основана 20 дена пред распишување на тендерот. Фирма без искуство, без капацитет, а вчера видовме и дека е без седиште. Фантом фирма ли е? Како е можно ваква фирма да добие тендер за специјализирана опрема за полицијата? Ова е огромен скандал поврзан со Панче Тошковски кој бара итна институционална реакција“,
додаде Кузеска.
Во меѓувреме, од ВМРО-ДПМНЕ преку писмено соопштение повторија дека тендерската постапка за набавка на униформи за специјалните единици во МВР е спроведена согласно сите законски прописи.