Овие мерки според опозициската партија ќе значат реална помош и ќе го подобрат стандардот на граѓаните
Време е Владата да запре со ПР и калкулации оти сиромаштијата не се решава со измислување на нови кошнички, туку со одговорна политика и итни конкретни мерки, вели потпретседателката на СДСМ, Кристина Костова.
На прес-конференција таа денеска порача дека Владата треба да ги прифати мерките кои опозициската партија ги предлага како зголемување на минималната плата на 500 евра и укинување на ДДВ на храна, со што, како што кажа, граѓаните ќе добијат реална помош и ќе се подобри нивниот стандард.
„ Граѓаните од месец во месец се посиромашни – трошоците за живот растат, а платите стагнираат. Според последните податоци, на едно четиричлено семејство во јули му се потребни над 65 000 денари само за основни трошоци. Само за храна, им требаат речиси 24 000 денари. Тоа е повеќе од минималната плата која стои ниско во место, додека цените пробиваат плафон. За само три месеци, синдикалната кошничка е поскапа за 2 637 денари. Годишната инфлација достигна 4,5%“,
вели Костова.
Таа вели оти овие бројки се алармантни и оти наместо „четврта економија“ се бројки на економија во колапс, што пак е јасен и цврст доказ за тоталниот дебакл на економските политики на оваа Влада и оти во вакви услови, додека народот не знае што ќе стави на трпеза, премиерот прави математики со пет типа на синдикални кошнички.
„Фактот дека народот нема пари не може да се сокрие со инженеринг во бројот на кошнички. Владата на Мицкоски и ДПМНЕ мислат дека ќе го заташкаат осиромашувањето на народот. Тие се целосно одлепени од реалноста и јасно потврдуваат дека немаат намера да преземат никакви мерки за да им помогнат на граѓаните. Додека кошничката на Владата е полна со скапи деликатеси, папаја, манго и аспарагус, луѓето немаат ниту за основни потреби“,
заклучи Костова.
Вчера, премиерот Мицкоски најави оти ќе предложи на следната седница на Економско-социјалниот совет, за која рече дека очекува да се одржи во најскоро време, синдикалната минимална кошничка да биде поделена во пет сегменти – потрошувачка кошничка за самец, за млад брачен пар, тричлено семејство, четиричлено семејство, како и кошничка за пензионери. Тој кажа и дека на овој начин би биле опфатени потребите на луѓето согласно нивната возраст, но и според бројноста во однос на тоа како е сочинета една заедница и оти ваквите анализи би дале повеќе информации за да се дојде до пооптимални резултати.