„Ако навистина тој е користен согласно процедурите, бараме Владата да го докаже тоа и да го објави списокот на патници, односно кој се бил со него во владиниот авион“, велат од опозицијата
Опозицискиот Социјалдемократски сојуз (СДСМ) бара од власта да докаже дека владиниот авион бил користен согласно процедурите и да објави кој се патувал заедно со премиерот Христијан Мицкоски.
„Владата на Мицкоски во обид да го оправда неговото луксузирање со владиниот авион на Јадранското Море соопшти дека јавно дека наводно авионот бил користен исклучиво во согласност со прописите и актите за негово користење и дека секое користење е евидентирано и документирано. Ако навистина тој е користен согласно процедурите, бараме Владата да го докаже тоа и да го објави списокот на патници, односно кој бил со Мицкоски во владиниот авион“,
се вели во партиската реакција.
Мицкоски: Ќе се повлечеме од набавката на нов владин авион и ќе се молиме да останеме живи
Во изјавата за медиумите премиерот Христијан Мицкоски вчера се осврна и на наводите кои пред неколку дена ги изнесе телевизијата Телма, односно дека од јуни 2024 година до декември 2025 година три пати го користел владиниот авион.
„Не три пати, четири пати сум го користел“,
рече тој.
Еднаш, како што рече, го искористил кога бил во Будимпешта на покана на унгарскиот премиер Виктор Орбан. Со комерцијален лет стигнал до Виена бидејќи екипажот на државниот авион имал приватни обврски и не можел да го однесе до дестинацијата.
Но за назад, како што рече, дошле по него бидејќи имал итни состаноци во Скопје.
„Вториот пат бев исто така на покана на нашата сестринска партија и на настан што тие го организираа во Белград. Тогаш и отидов и се вратив. Тоа не е споменато во јавноста, а сакам да се забележи“,
кажа Мицкоски.
Владиниот авион премиерот го искористил и кога ланското лето се враќал од одмор од Сплит во Скопје оти го пропуштил летот на авиокомпанијата „Кроација ерлајнс“, а следниот ден имал неодложни обврски во Скопје.
„Бев до Хрватска со комерцијален лет на ‘Кроација ерлајнс’ до Сплит, на покана на хрватскиот претседател Зоран Милановиќ, имавме работна вечера. Мојот годишен одмор, кој требаше да трае три дена, го продолжив за еден ден, да трае четири дена, и бидејќи го испуштив повратниот комерцијален лет за да се вратам, а следниот ден имав неодложни обврски, владиниот воздухоплов дојде ме земе од аеродромот во Сплит и ме донесе во Скопје“,
вели премиерот.
Последно, како што рече, бил во Тирана и го искористел владиниот авион во двата правци.
Мицкоски уште отсега најави дека на почетокот на јуни најверојатно ќе го користи владиниот воздухоплов до Подгорица и назад до Скопје оти поради обврски не би сакал да остане повеќе од еден ден.
По обвинувањата на СДСМ, од Владата вчера информираа дека владиниот авион е користен исклучиво согласно прописите и актите за негово користење и дека не постои каква било форма на злоупотреба.
Владиниот авион е користен исклучиво согласно прописите – велат од владата
Инаку, изминатиот период СДСМ реагираат за користењето на владиниот авион, посочувајќи дека Мицкоски патувал со владиниот авион на одмор до Јадранското Море, а нема пари за зголемување на минималната плата на 600 евра за работниците.
Премиерот до Јадран лета со владиниот авион, а нема пари за 600 евра минималец – велат од СДСМ
Директорот на Службата за општи и заеднички работи (СОЗР), Ивица Томовски, неодамна најави дека Владата размислува да изнајде начин за набавка на нов владин авион бидејќи, како што рече, сегашниот е склон на чести поправки и е премал за да се користи за соодветна делегација.