Доколку Владата не го повлече законот од скратена и не го поднесе во редовна постапка, со цел отворање јавна расправа, посочи партискиот лидер и пратеник Венко Филипче, СДСМ нема да учествува во постапката и нема да закаже седница на матичната собраниска Комисија за финансирање и буџет
Пратеничката група на опозицискиот СДСМ во Собранието денеска ја повика власта да го повлече предлог-законот за задолжувањето од 500 милиони евра кај Унгарската експорт-импорт банка, кој е поднесен во скратена постапка, и да го поднесе во редовна постапка.
Во спротивно, како што посочи партискиот лидер и пратеник Венко Филипче, СДСМ, кој ја води Комисијата за финансирање и буџет во Собранието, нема да го стави овој закон на расправа.
„Да организираме јавна експертска дебата, а законот да ги помине сите филтри. Да се прецизира секој аспект на задолжувањето, да се расчистат сите дилеми и да се гарантира дека граѓаните ќе бидат заштитени. Доколку ВМРО-ДПМНЕ не го направи ова, тогаш јасно потврдува дека има сосема други скриени намери. Ако го поминете законот вака, на чело ќе си напишете сами на себе за корупцијата која ја правите“,
изјави лидерот на СДСМ, Венко Филипче, на денешната прес-конференција во Собранието.
Доколку Владата не го повлече законот и не го поднесе во редовна постапка со цел отворање јавна расправа, повтори Филипче, СДСМ нема да учестvува во постапката и нема да закаже седница на матичната комисија.
„Ние го кажавме нашиот став, оставаме на претседателот на Собранието да одлучи како ќе ја тера постапката со сите комисии“,
додаде партискиот лидер и пратеник.
Крајно недозволиво и неодговорно, според СДСМ, е законот за задолжувањето да се носи по скратена постапка зашто, како што обвинија, во него не постојат јасни критериуми и механизми за распределба на позајмените пари, не постои јасно утврден систем за контрола на трошењето на парите, како и дека се кријат скриени трошоци.
„Самиот предлог-закон изобилува со нелогичности и недоречености и истиот мора да биде предмет на широка јавна расправа, прецизно утврдување на секој детал во овој договор и секој денар кој треба да го плаќаат граѓаните како камата. Во самиот закон постојат јасно видливи елементи со кои се потврдува огромната корупција. Најважно, ова задолжување беше договорено уште кога ВМРО-ДПМНЕ беше опозиција, целосно вонинституционално и во четири очи. Како што тогаш бил договорен законот надвор од сите процедури, така и сега Владата сака да го изгласа надвор од секаква дебата или анализа. Ова СДСМ го смета за скандал“,
изјави Филипче.
Претходно денеска премиерот Христијан Мицкоски изјави дека очекува опозицијата на недемократски начин да ја опструира работата на собраниската Комисија за финансирање и буџет на која треба да се разгледува предлог-законот за задолжување кај Унгарската експорт-импорт банка, кој се носи по скратена постапка.