Говорејќи во име на опозициската партија, Елена Радеска од комисијата за здравство на СДСМ рече оти бараат и очекуваат Владата, директорот на Фондот за здравство и новиот министер за здравство уште во текот на денешниот ден да обезбедат хемотерапија, а Министерството за здравство јавно да соопшти каде е проблемот и кој ќе сноси одговорност за, како што кажа, оваа хумана катастрофа
Опозицискиот Социјалдемократски сојуз на Македонија (СДСМ) денеска реагира на состојбите во здравствениот сектор во земјава, конкретно на Клиниката за онкологија, откако викендов 64-годишна жена која се лекува од рак на белите дробови излезе со наводи дека на Клиниката нема терапија за оваа тешка болест.
Ставот на социјалдемократите го соопшти Елена Радеска од комисијата за здравство на СДСМ, која за состојбата во здравството, што ја оцени како катастрофална и нечовечна, ја обвини владата предводена од ВМРО-ДПМНЕ, министерот за здравство Азир Алиу и директорот на Фондот за здравство Сашо Клековски.
„Додека министрите заедно со уште по минимум 5 до 10 луѓе од кабинетите патуваат на скапи службени патувања, пациенти со рак умираат во неизвесност, без основна хемотерапија, без лек. На Клиниката за онкологија нема лекови за пациентите со рак на бели дробови – ниту класична хемотерапија, ниту неопходната биолошка терапија како што е лекот ‘ерлотиниб’ (erlotinib), која е недостапна на клиниката од средината на мај. Скоро месец и половина“,
рече Радеска.
Според неа, во случајов не станува збор за бирократски попуст, туку за загрозување на човечки животи додека надлежните се занимаваат со други теми.
„Министерот нема поим што се случува, ‘мисли’ дека лековите се пристигнати, и продолжува да се занимава со криминалниот проект на неговиот претходник за тендерот за паркинг места. Додека пак директорот на Универзитетската клиника за радио терапија и онкологија радиотерапија признаваат дека ‘понекогаш недостигаат лекови’ но не преземаат ништо. Лековите ги нема, а пациентите страдаат. Тоа е вистината“,
рече таа.
Радеска во таа насока постави и неколку прашања, односно како може во 2025 година и покрај сите ветувањата на актуелната власта онколошките пациенти да бидат оставени без терапија, и како е можно е лекот „ерлотиниб“ кој е на листата на основни лекови на Светската здравствена организација (СЗО) да не е достапен кога земјава како држава членка на Обединетите нации е потписничка на здравствени повелби.
Таа праша и зошто нема итен план за набавка на лековите од кои зависат животите на пациентите кои се лекуваат од оваа тешка болест.
Говорејќи во име на опозициската партија, Радеска рече оти бараат и очекуваат Владата, директорот на Фондот за здравство и новиот министер за здравство уште во текот на денешниот ден да обезбедат хемотерапија, а Министерството за здравство јавно да соопшти каде е проблемот и кој ќе сноси одговорност за, како што кажа, оваа хумана катастрофа.
„Бараме гаранции за непрекинат третман за сите пациенти со рак. И конечно одговорност, и тоа онаа иста одговорност на премиерот што нема да поштеди никого. А што ние до сега не ја ни видовме. Здравството не е трошок. Тоа е обврска! Животот нема алтернатива! Затоа, не прифаќаме молк! Не прифаќаме празни ветувања! Одговорност мора да има!“,
рече Радеска.
Наводите дека на Клиниката за радиотерапија и онкологија нема терапија за болните од рак на бели дробови вчера во изјава за ТВ Телма ги изнесе 64-годишна пациентка што се лекува на Клиниката.
Говорејќи по услов да остане анонимна од страв дека потоа може да има проблем во процесот на лекување, таа изјави дека неодамна и бил дијагностициран рака на белите дробови во четврти стадиум на болеста.
Од препишаните четири хемотерапии, една примила на 28 мај, но кога требало да ја прими втората, закажана за 18 јуни, за неа немало терапија, со образложение дека сè уште не пристигнале набавените лекови за нејзиниот тип на канцер.
Министерот за здравство Азир Алиу прашан вчера на прес-конференција зошто нема терапија за дел од пациентите на Онкологија, рече дека за тоа веќе разговарал со директорот на Клиниката и дека терапијата е набавена, но не беше сигурен дали ја има за сите пациенти.
Тој најави дека денеска ќе повторно ќе се сретне со директорот на Клиниката за да види во што е проблемот.
„Мислам дека терапијата не само што е стигната, туку е и процесирана. Значи дадена е на пациентите. Но, утре ќе се сретнам со директорот и ќе видам што е проблемот и дали можеби дел од некои од елементите внатре во терапијата се стигнати или не. Денеска немам информација за тоа“,
рече Алиу.
Директорот на Клиниката за онкологија, Игор Стојковски, пред три дена изјави дека во моментов лековите за болните од рак се достапни, но дека постои можност повремено да се појави недостиг, како резултат на повеќе фактори што се надвор од контрола на установата со која раководи.
Тие фактори, како што посочи, се зголемен број на пациенти, административни процедури поврзани со јавните набавки, како и доцнење во испораката од страна на производителите и дистрибутерите.