Причините за овие загуби, според генералниот секретар на партијата, се директно поврзани со начинот на управување во енергетскиот сектор, додавајќи дека Владата ја доведе ЕСМ до финансиски колапс
Опозицискиот Социјалдемократски сојуз (СДСМ) бара Јавното обвинителство да отвори истрага за загубите од 100 милиони евра во ЕСМ. Ова денеска на прес-конференција го соопшти генералниот секретар на партијата, Александар Саша Димитријевиќ, посочувајќи дека работењето на компанијата резултира со сериозни финансиски загуби.
Од денешната прес-конференција на генералниот секретар на СДСМ, Александар Саша Димитријевиќ / Фото: Принтскрин
„Кој ќе одговара за загубите од над 100 милиони евра? Само во првите два квартала од годинава има 77 милиони евра загуба, а проекцијата е дека ќе достигне над 100 милиони евра до крајот на 2025 година. Кој профитира од увозот на струја? Кој заработува додека народот плаќа?“,
праша тој.
Причините за овие загуби, според него, се директно поврзани со начинот на управување во енергетскиот сектор, додавајќи дека Владата ја доведе ЕСМ до финансиски колапс.
„За само година и половина, со Божиновска на чело на овој сектор, Владата ја доведе ЕСМ до финансиски и производствен колапс. Не се произведува доволно струја дома, се увезува скапа струја однадвор“,
вели Димитријевиќ.
Посочи дека наместо да се произведува дома, а државата ќе ја чини 80 до 90 евра за мегават-час, Владата купува струја за 140 евра мегават часови.
Според него, поскапувањето на струјата и прогласувањето кризна состојба не се поради протестите во Грција, туку поради криминалните тендери и неспособното управување на власта во енергетскиот сектор.
Од партијата Левица денеска излегоа со реакција дека енергетскиот сектор во државата е во колапс по вчерашното прогласување на кризна состојба и покачување на цената на струјата, како што велат, под диктат на приватниот монопол „ЕВН хоум“.
Оттаму бараат и итно замрзнување на цената на струјата за домаќинствата и преиспитување на одлуката, како и државната ЕСМ продажба да биде постојан законски универзален снабдувач.
Владата на вчерашната седница, на предлог на Управувачкиот комитет за координација и управување со системот за управување со кризи, донесе одлука за постоење кризна состојба во снабдувањето со електричната енергија на целата територија на државата во рок од 7 дена од денот на влегување во сила на оваа одлука.
АД ЕСМ минатата недела преку писмо побара од Владата да прогласи кризна состојба на пазарот со струја поради секојдневните блокади на грчките земјоделци, што ја отежнува доставата на енергенти потребни за производство на електрична енергија и побара од Владата да се користат државните резерви.
