„И додека се бркаат чиновници од пред десет години, началниците и командирите што таа вечер имале директна обврска да постапат остануваат недопрени. Власта сака јавноста да заборави дека полицијата била таму и не направила ништо“, велат од опозициската партија
Од Социјалдемократскиот сојуз (СДСМ) денеска побараа итно проширување на истрагата во Кочани кон актуелните функционери што биле директно одговорни на денот на трагедијата. Покрај тоа, бараат и да се стави крај на политичката злоупотреба на Обвинителството и институциите.
„Истрагата за трагедијата во Кочани се претвори во класичен политички театар во режија на ДПМНЕ. Наместо да се фокусираат на актуелните пропусти вечерта на трагедијата, кога полицијата не реагирала и не затворила објект, а дозволила присуство на малолетни лица и употреба на пиротехнички средства, власта оди десет години наназад со цел да ги заштити актуелните началници и службеници од други институции што биле директно одговорни за настанот“,
се вели во реакцијата од опозициската партија.
Оттаму велат дека се отвора мегапроцес, вештачки надуван, во кој не се гони конкретна одговорност, туку се гради наратив – да се покаже одлучност и борба против криминалот, со цел прикривање на одговорните.
„И додека се бркаат чиновници од пред десет години, началниците и командирите што таа вечер имале директна обврска да постапат, остануваат недопрени. Власта сака јавноста да заборави дека полицијата била таму и не направила ништо“,
наведуваат од СДСМ.
Со ваквиот пристап, посочува опозициската партија дека се ставаат под прашање и самите правни постапки, кои стануваат товар за Обвинителството и за судството.
Од Демократската унија за интеграција (ДУИ) денеска обвинија дека истрагата за пожарот во Кочани станува уникатен пример за правна импровизација, воден не од закон, туку од желба за аплауз.
Министерот за внатрешни работи Панче Тошковски, денеска коментирајќи ја истрагата за трагедијата во Кочани рече дека сето она што е преземено како дејствие е споделено со јавноста.
Се надева дека за максимално краток временски период ќе се затвори целокупната истрага за пожарот во Кочани за да може да се може да се продолжи со останатиот дел од постапката.
Во Кочани денеска родителите и семејствата на загинатите во пожарот одржаа трет протестен марш. Бараат правда за нивните починати деца, велејќи дека ако институциите навремено си ја вршеле работата, немало до дојде до оваа трагедија.