Според СДСМ, Велковски мора да се одлучи за едно од двете места, односно мора да биде разрешен од функцијата секретар на Градот или да го врати советничкиот мандат
СДСМ бара Државната комисија за спречување корупција (ДКСК) да постапи за случајот со назначувањето на Ѓоко Велковски за секретар на Град Скопје, кој беше назначен додека истовремено е советник во Советот на Општина Чаир
Огромен скандал е назначувањето на Ѓоко Велковски за секретар на Град Скопје од страна на Данела Арсовска и ВМРО-ДПМНЕ.
Поставувањето на Велковски на оваа позиција е очигледно прекршување на законите, односно спротивно на член 44 од Законот за спречување на корупција и судир на интереси.
„Велковски во исто време е и советник од редовите на ВМРО-ДПМНЕ во Советот на Општина Чаир, за што добива месечен надомест од околу 18 000 денари. Неговата плата во Град Скопје е околу 50 000 денари, што значи дека Велковски од парите на граѓаните месечно добива околу 68 000 денари. Ја повикуваме Државната комисија за спречување на корупцијата да постапи по ова очигледно прекршување на законите, случајот да биде расчистен, а одговорните да бидат соодветно санкционирани согласно законите“,
повика денеска на прес-конференција советничката од СДСМ во Град Скопје, Лилјана Божиновска, според која прекршен е членот 44 од Законот за спречување корупција и судир на интереси.
Според СДСМ, Велковски мора се одлучи за едно од двете места односно мора да биде разрешен од функцијата секретар на Градот или да го врати советничкиот мандат.
„Арсовска мора да одговара за ваквото незаконско и самоволно постапување. Уште еднаш се докажа дека освен груба партизација на градската администрација Арсовска не работи ништо друго. ВМРО-ДПМНЕ не се менува, продолжува со истата режимска матрица, продолжува да ги прекршува законите и да работи на штета на граѓаните“,
вели Божиновска.