Според заменик министерот за надворешни работи на Бугарија, Костадин Коџабашев, Азербејџан е приоритетен партнер на Бугарија во Јужен Кавказ и во поширокиот регион на Црното Море, а особено во областа на енергетската диверзификација
Министерот за надворешни работи на Бугарија Николај Милков и амбасадорот на Саудиска Арабија во Софија Халид бин Камал Факих разговарале за билатералната соработка во енергетскиот сектор, соопшти прес-службата на Министерството.
Како што јави дописникот на МИА од Софија, Саудиска Арабија е подготвена да испорача нафта и природен гас во Бугарија. Главен фокус на нивната средба била подготвеноста на саудиската страна за продлабочување на билатералната соработка во областа на енергетиката.
Министерот Милков му се заблагодарил на амбасадорот и истакнал дека треба заедно да се проучат методите и средствата за реализација на ваква испорака.
Двајцата разговарале и за партнерство во области како што се економијата, инвестициите, земјоделството, туризмот, одбраната, високите технологии и здравството.
Истовремено, заменик министерот за надворешни работи на Бугарија, Костадин Коџабашев, се сретнал со амбасадорот на Азербејџан во Софија Хусеин Хусеинов.
Покрај 30-годишнината од воспоставувањето билатерални односи меѓу Бугарија и Азербејџан, двајцата разговарале и за улогата на Баку во енергетскиот сектор на Софија.
Според Коџабашев, Азербејџан е приоритетен партнер на Бугарија во Јужен Кавказ и во поширокиот регион на Црното Море, а особено во областа на енергетската диверзификација. Тие разговарале и за посетата на претседателот на Азербејџан Илхан Алиев на Бугарија на есен.