Телевизиите и радијата во земјава лани забележале пад на приходите во споредба со претходната година, покажува анализата на пазарот на аудио и аудиовизуелни медиумски услуги за 2018 година што ја направи Агенцијата за медиуми.
Според податоците, единствено телевизија Алфа има раст на приходите за 35,45 насто споредено со 2017 година. Останатите четири телевизии со национална концесија имаат пад на приходите: Алсат-М за 1,07 %, Сител за 4,29 %, Телма за 4,35 % и Канал 5 за 8,51 %.
ТВ Алфа во 2018 година остварила и најголема добивка од 29,86 милиони денари. Другите телевизии се далеку под оваа сума: Алсат-М 5,36 милиони денари, Канал5 0,28 милиони денари, Сител 18,68 милиони денари, а Телма работела со загуба и остварила негативен финансиски резултат од 21,48 милиони денари.
Сопственичката структура на телевизија Алфа се измени во 2017 година. Тогаш во неа влезе фирмата „Таргет медиа“ ДООЕЛ чиј сопственик е Петар Шац од Будимпешта. Од Унгарија е и Агнеш Адамик која се јавува како сопственичка на „Адинамик Медиа“ ДООЕЛ – фирма која минатата година стана дел од сопственичката структура на порталите „Курир“ и „Република“.
Трите медиуми во кои влегува унгарски капитал се со уредувачка политика блиска до опозициската ВМРО-ДПМНЕ.
Истражувачкиот портал Призма минатата година објави истражување во кое до детали се анализира поврзаноста на Петар Шац и Агнеш Адамик со унгарскиот премиер Виктор Орбан.
Политички азил во Унгарија доби пребеганиот екс-премиер на С. Македонија, Никола Груевски, кој важи за близок пријател на Орбан.