Денеска во Лондон почнува самитот на НАТО, по повод 70 годишнината од формирањето на овој најголем воен сојуз во светот. НАТО се соочува со низа предизвици, пoоради што лидерите на Алијансата, освен церемонијалниот дел на прославата, имаат многу теми за кои ќе разговараат: војната во Сирија и односите меѓу двете земји членки на НАТО, САД и Турција, руските воени закани, тероризмот и сајбер нападите.
Земјите-членки на НАТО, според очекувањата, ќе ја потврдат гаранцијата за колективна одбрана на Унијата.
На самитот на НАТО во Лондон македонската делегација ќе ја предводи премиерот Зоран Заев, а во нејзин состав ќе бидат и министерката за одбрана Радмила Шекеринска и шефот на дипломатијата Никола Димитров.
Во завршната декларација од Самитот предвидено е во посебен параграф да биде забележано дека земјата е добродојдена како 30 членка.
„Со задоволство Ви соопштувам дека САД го депонираа ратификуваниот Протокол за пристапување на Северна Македонија во НАТО. Еден чекор поблиску да и посакаме добредојде на Северна Македонија како 30-ти сојузник на НАТО“, напиша вчера државниот секретар Мајк Помпео на Твитер во пресрет на Самитот.
Американскиот Сенат го ратификува Протоколот за членство на земјава во Алијансата на 22 октомври годинава.
За десет месеци, Протоколот за пристапување во НАТО го ратификувааа 28 од вкупно 29 членки.
Од полноправното членство во НАТО, Северна Македонија ја дели само една ратификација-од Шпанија, каде неодамна се одржаа парламентарни избори и во тек се разговори за формирање влада.
Џејмс Апатураи, заменик помошник на генералниот секретар на НАТО за политички прашања, неодамна во интервју за Радио Слободна Европа рече дека на лидерскиот состанок на НАТО во Лондон, на сите ќе им биде јасно дека Северна Македонија е на самиот праг, а нивните очекувања се дека рано напролет земјата ќе биде и членка на Алијансата.
На прашањето, дали откако ЕУ не ѝ даде на Македонија датум за почеток на преговорите, НАТО ќе го забрза приемот на Скопје за да се санира штетата направена со затворањето на европската врата, Апатураи вели дека како и за сечие зачленување во Алијансата, така и за Македонија, постои распоред кој е навремен и нема потреба од забрзување.