Генералниот секретар на НАТО, Марк Руте, изјави дека плановите за инвестиции во војската ќе бидат договорени за време на самитот во Хаг, подвлекувајќи дека тоа е најмалку пет проценти од БДП за воени цели
Во Хаг започнува дводневен самит на НАТО каде што фокусот ќе биде ставен на трошоците на земјите членки за одбрана предложени од американскиот претседател Доналд Трамп. Главна тема ќе биде согласноста на членките да издвојат пет проценти од БДП за одбрана, што е зголемување во споредба со сегашните два проценти.
На самитот на НАТО во Хаг беа прогласени две цели: распределбата на земјите членки за одбрана да достигне пет проценти од нивните буџети во следните 10 години и да се демонстрира единство.
Генералниот секретар на НАТО, Марк Руте, изјави дека плановите за инвестиции во војската ќе бидат договорени за време на самитот во Хаг, подвлекувајќи дека тоа е најмалку пет проценти од БДП за воени цели.
„Тоа е квантен скок кој е амбициозен, историски и фундаментален за обезбедување на нашата иднина“,
рече Руте.
Тој истакна дека зголемувањето на воените трошоци е важно бидејќи, како што рече тој, Русија секојдневно извршува терористички, смртоносни напади над небото на Украина.
„Мора да можеме да се одбраниме од вакви напади, ќе обезбедиме уште илјадници тенкови и оклопни возила, мора да ги одбраниме нашите војници на бојното поле“,
изјави Руте.
Во Хаг се очекуваат 9 000 учесници, односно вкупно 45 делегации и Доналд Трамп чиешто пристигнување поради конфликтот на Блискиот Исток засега е сè уште под знак прашалник.
Војната меѓу Израел и Иран ќе биде тема на самитот поради комплицираната ситуација што се појави пред два дена кога Америка се придружи на нападот со бомбардирање на нуклеарните постројки на Иран, а вчера Техеран одговори со напад на американските бази во Катар.
По ова следеше прогласување на крајот на 12-дневната војна од страна на Доналд Трамп.
Иран и Русија теми на самитот
Генералниот секретар на НАТО, Марк Руте, потврди дека Иран е важна тема на самитот на НАТО во Хаг. Тој нагласи дека тоа ќе биде тема на дискусија меѓу самите лидери, но и на маргините на самитот.
За разлика од минатогодишниот самит во Вашингтон, кога војната во Газа беше опишана како „слон во соба“, важна тема за која не се дискутираше, Иран ќе биде тема во Хаг.
Украина е важна тема за самитот на НАТО, но не како пред две години на самитот во Вилнус, кога украинскиот претседател очекуваше дека ќе следи покана за членство во НАТО до Украина.
Володимир Зеленски сега ќе учествува на самитот на НАТО во Хаг на вечерата организирана во чест на лидерите на 32 членки на НАТО, но не и на сесиите.
Русија е спомената во финалниот документ од овогодинешниот самит на НАТО во Хаг. Ројтерс имаше пристап до тој документ и таа е спомената само на едно место „како долгорочна закана за евроатлантската безбедност“.