Иран вчера лансираше стотици ракети кон Израел како одговор на елиминацијата на неговите сојузници, лидерите на либанската Хезболах и палестинската групација Хамас. Овој напад е втор во последните шест месеци
Иранскиот напад врз Израел се покажа неефикасен и беше одбиен од израелските сили за противвоздушна одбрана со поддршка на САД, изјави синоќа советникот за национална безбедност на Белата куќа, Џејк Саливан.
Тој нагласи дека Вашингтон моментално „нема податоци за починати во Израел“ и проверува информации за смртта на еден цивил на окупираниот Западен Брег како резултат на иранскиот напад.
Саливан го нарече нападот „значајна ескалација од страна на Иран“.
Иран вчера лансираше стотици ракети кон Израел како одговор на елиминацијата на неговите сојузници, лидерите на либанската Хезболах и палестинската групација Хамас. Овој напад е втор во последните шест месеци.
Иранскиот претседате Масуд Пезешкијан предупреди дека нападот на Израел е само дел од моќта на Иран. На израелскиот премиер Бенјамин Нетанјаху му порача оти Иран не поттикнува воени конфликти, но силно одговара на секоја закана.
Израел се закани со одмазднички акции.
„Овој напад нема да остане без последици“,
предупреди портпаролот на израелската армија, контраадмирал Даниел Хагари.
Израелскиот премиер Бенјамин Нетанјаху, пак, порача дека Иран направил голема грешка „и ќе плати за тоа“.
Портпаролот на Стејт департментот, Метју Милер, соопшти дека засега нема информации за оштетување на американски објекти.
„Немаме податоци за цивилни жртви во Израел, а уште помалку за американски граѓани. Има извештај за смртта на еден Палестинец на Западниот Брег, но нема податоци за оштетувања на американски објекти“,
додаде Милер.