„Сметам дека овој ден е само за одбележување на Денот на здравјето, а не за протестирање. Меѓутоа, тоа е легитимно право и јас ќе им се придружам“, рече министерот за здравство Беким Сали коментирајќи го денешниот трет по ред протест на лекарите во земјава кои бараат слух од здравствените власти во врска со нивните барања
Третиот по ред протест на матичните лекари во земјава, кој е најавен за денеска, министерот за здравство Беким Сали го оцени како легитимен, меѓутоа ненавремен.
Тој додаде дека е во постојан контакт со сите здруженија кои се вклучени во протестот и оти се запознаени оти Министерството на новиот модел на финансирање на примарната здравствена заштита.
„Сите тие претставници на здруженијата знаат дека ние интензивно работиме на нов модел на финансирање на примарната здравствена заштита и сметам дека овој ден е само за одбележување на Денот на здравјето, а не за протестирање. Меѓутоа, тоа е легитимно право и јас ќе им се придружам. Тие денеска ќе ми бидат гости и драго ќе ми биде да ги видам во протестот како група“,
рече Сали одговарајќи на новинарски прашања по посетата на реновираниот оддел за онкологија на Универзитетската клиника за детски болести.
Симболично со денешниот ден – Светскиот ден на здравјето, со почеток во 12 часот, е најавен третиот по ред протест на матичните лекари во земјава, кои својот револт ќе го изразат пред Министерството за здравство барајќи слух од институциите за нивните барања.
Во пресрет на протестот, но и на Светскиот ден на здравјето, претседателката на Лекарската комора, проф. д-р Калина Гривчева-Старделова, истакна оти за заштита на здравјето како основно човеково право, неопходно е во креирањето мерки и политики да постои конзистентен пристап за зачувување на животната средина, унапредување на здравствениот систем и на лекарската професија.
Таа посочува оти за унапредување на состојбите е неопходно што поскоро да влезат во собраниска процедура и да бидат побрзо изгласани измените на Законот за здравствена заштита, со што ќе се регулира правото на дополнителна дејност, како и можноста матичните пациенти да се водат на здравствената установа, а не на матичниот лекар.
„Неопходно е побрзо донесување на измените на Кривичниот законик со кои нападот врз здравствен работник се смета за напад врз службено лице, што значително ќе придонесе за создавање на побезбедни услови на работното место. Законските измени подолго време без причина чекаат зелено светло од пратениците, поради што е потребно конечно да се заврши постапката на нивно донесување и да стапат во примена. Здравствениот систем не може да биде стабилен и одржлив доколку во него не ги задржиме младите лекари. За да се постигне тоа неопходно е да бидат мотивирани со подобрување на условите за вработување и работење, како и унапредување на знаењата и создавање можности за развивање на научната дејност. Законот за докторска дејност, исто така, е неопходно да стане дел од позитивните правни прописи, поради тоа што со него може да се направи баланс меѓу правата и обврските кои ги носи современиот начин на живот и начин на работа“,
истакнува проф. д-р Гривчева Старделова.
Таа посочува и оти Лекарската комора во континуитет е во комуникација со сите надлежни институции и активно се залага за надминување на предизвиците и подобрување на состојбите. Очекува во претстојниот период да се постигне поширок општествен консензус и разбирање кај оние кои, како што вели, ги носат одлуките за потребата од процесирање на истакнатите забелешки.