Комисијата за заразни болести утре ќе одлучува кога и како ќе се спроведе скринингот во школите, а министерот за здравство смета дека првата недела е најбитна за да може да се реагира
Засега остануваат рестриктивните мерки кои се во сила и нема ниту воведување на нови, ниту намаување на актуелните, вели министерот за здравство Беким Сали.
На прашањето, дали ќе се укинуваат сертификатите за вакцинација, тој рече дека за тоа се уште е рано, бидејќи земјава е се уште во пикот на четвртиот бран, а процентот на вакцинација се уште е низок.
Тој рече дека има благо намалување на бројот за зараени на дневна основа, но призна дека има благ пораст на хоспитализации.
„Има благо покачување на хоситализации веќе 10 дена, но во тек сме со состојбата и ја контролираме. Има доволно и капацитет и кадар кој е добро организиран. Сега ни останува да почекаме намалување на бројките на заразени, кои еве веќе се намалуваат“, рече Сали.
Комисијата за заразни болести на утрешната седница ќе одлучува како ќе се спроведе скринингот во училиштата. Сали минатата недела рече дека наставата во второто полугодие утре почнува со физичко присуство, но дека ќе се прави скрининг по случаен избор.
„Ќе се прави преку физичко присуство, преку центрите за јавно здравје и ќе бидеме во служба на јавноста за евентуално преземање на некои мерки. Утре на Комисијата за заразни болести ќе одлучиме кога ќе почне, битна е првата недела за да се реагира ако треба дополнителни мерки и ќе се анализира начинот на спроведување на скринингот“,
рече Сали, одговарајќи на новинарско прашање дали ќе биде како минатиот кој не се покажа како успешен.