„Се нафатив на една работа којашто остава траги зад себе и тоа се мојата желба и мојот фокус. Во исто време сум свесен, апсолутно свесен, не сум јас од вчера во оваа работа, дека одредени кујни и одредени спин-мајстори сакаат да создадат привид за проблем или за раскол или за што било во ВМРО-ДПМНЕ“, вели вицепремиерот и министер за транспорт по одлуката на Христијан Мицкоски да не прифати промени на Статутот на партијата, што значи дека ВМРО-ДПМНЕ во 2029 г. ќе има нов претседател
Дискусиите во јавноста за тоа кој ќе го наследи лидерското место на Христијан Мицкоски во ВМРО-ДПМНЕ се спинови и теории на заговор, вели вицепремиерот и министер за транспорт Александар Николоски во интервју за „360 степени“ на МРТ 1. Според него, не треба да се бара скриена порака ниту во одлуката на Мицкоски да нема потпретседатели на партијата во овој негов лидерски мандат.
„Кога ВМРО-ДПМНЕ не би била во оваа позиција во којашто е сега, веројатно тие дискусии би дошле два-три месеци пред следниот конгрес, редовен, значи некаде август-септември 2029 година. Но, затоа што е извесно дека ВМРО-ДПМНЕ и во 2029 година ќе е најголема политичка партија во Македонија, ќе е најсилна политичка партија во Македонија и многу веројатно ќе ја води Владата и тогаш, природно е јавноста да пробудува интерес и во менталитет, каков што е нашиот и регионалниот, не е само за Македонија тоа специфика, природно се јавуваат теории на заговор, конспирации итн. И затоа добро е што повеќе од тие конспирации и теории на заговор да се пресретнат, со цел партијата да може да е насочена кон она што е основна нејзина функција сега, а тоа е да ја води државата и нормално, она што е функција на сегашното раководство на ВМРО-ДПМНЕ кое што има мандат до 2029 година, а тоа е да донесе три изборни победи. Затоа што раководство во секоја политичка партија се носи за да победува на избори. Ние имаме парламентарни избори 2028 година, локални и претседателски избори 2029 година, така што имаме три изборни циклуси на коишто ова раководство треба да победи“,
рече Николоски.
На прашање кон кого беше упатена пораката на Мицкоски од конгресот во Кавадарци: „кој мисли дека функцијата се наследува заради блискост или по случаен пат со сплетени мрежи и со неконзистентност – погрешил; кој мисли дека довчерашните субјективни заслуги ќе му донесат утешна награда, не ја разбрал оваа партија“, Николоски вели:
„Ние имаме преку три илјади функционери, од највисоко до најниско ниво. И државава е мала. Генерално, тие се структурите и одредени структури внатре во партијата веројатно и мислат дека мора нешто да добијат, дека мора тоа да се случи. Ние јасно покажуваме дека не се согласуваме со тој концепт и ако можете да имате контрола и опсервација еве за дваесетина, па можеби и триесет ресори, тоа е максимум што може да се опсервира, натаму веќе останува на етиката, на моралот, секако на почитување на законот и на Уставот. И во таа насока мислам дека ваква порака е здрава и ова беше во контекст на сè она што се случува во партијата“.
Николоски не одговори директно на прашањето дали има амбиција за лидер на ВМРО-ДПМНЕ. Вели дека е рано и дека има време до 2029 година да се носат одлуки.
Николоски: „Ако треба денеска да дадам одговор, би рекол дека повеќе би сакал да се посветам на ова што сум посветен, а тоа е да оставам трајни дела зад себе, секако со поддршка и на премиерот и на Владата. Се нафатив на една работа којашто остава траги зад себе и тоа е мојата желба и мојот фокус. Во исто време сум свесен, апсолутно свесен, не сум јас од вчера во оваа работа, дека одредени кујни и одредени спин-мајстори сакаат да создадат привид за проблем или за раскол или за било што во ВМРО-ДПМНЕ, што континуирано го прават од некаде 2018 година и никако не им успева од едноставна причина што немаат ни еден процент почва за тие свои приказни и затоа тоа семе не може да изрти.
„360 степени“: Што е неприродно да имате амбиција за лидер?
Николоски: „Неприродни се спиновите коишто се пуштаат, затоа што ние сега сме 2026 година. И во 2026 година се зборува за 2029-30 година, мислам дека е несериозно. Во услови кога ние сме најблиски соработници, на дневна основа комуницираме, соработуваме и мислам дека на многумина на политичката сцена им е навистина недраго, не сакам да употребам други изрази, што ние вака функционираме и што ова трае со години и се свесни дека ќе трае со години и што имаме една ваква соработка што носи резултати за државата.“