Портпаролот на Стејт департментот порача дека двете земји ги сработиле основните задачи и време е да продолжат понатаму во следната фаза, а САД, како што посочи, водат билатерални разговори со Скопје и Софија за двете земји да ги решат споровите
САД на билатерална основа водат разговори со Бугарија и Северна Македонија да ги решат билатералните спорови брзо бидејќи време е Северна Македонија и Албанија да ги започнат претпристапните преговори со ЕУ, порачаа од Стејт департментот.
Државниот секретар Ентони Блинкен и министерот за надворешни работи на Франција, Жан-Ив Ле Дриен во телефонски разговор минатата недела укажаа на забрзување на процесот.
На прашање од МИА да се откријат детали и рокови во врска со ова, портпаролот Нед Прајс синоќа одговори дека се продолжува со охрабрување на билатерална основа како на Бугарија така и на Северна Македонија да ги решат билатералните спорови брзо.
„Но, нема да откривам детали за тие разговори“,
рече Прајс.
Тој укажа дека САД одамна се голем поддржувач на интеграцијата на Северна Македонија и Албанија во ЕУ.
„Сметаме дека иднината на Западен Балкан е во ЕУ. Процесот на проширување промовира долготраен мир, стабилност и просперитет низ целиот регион“,
изјави тој.
Тој додаде дека одлуката на ЕУ од март 2020 да се отворат преговорите за пристапување за Северна Македонија и Албанија ја сметаат за позитивен чекор.
„Двете земји ги сработија основните задачи и сметаме дека време е да продолжат заедно во следната фаза од долгиот и полн со предизвици процес на пристапување“,
повика Прајс.
Портпаролот додаде дека „историскиот Договор од Преспа покажа дека земјите од Западен Балкан се способни да завршат тешки работи, да дојдат до компромиси и тешки одлуки, и убедени сме дека Бугарија и Северна Македонија ќе го сторат истото со преговарање на нивните билатерални спорови“.