Ослободувањето од царини т.н. „de minimus“ е во сила од 1938 година, а во 2015 година беше зголемено од 200 на 800 американски долари, со цел да се поттикне растот на малите бизниси на платформите за трговија преку интернет
Ослободувањето од царини за пакети под 800 американски долари што се применуваше во Соединетите Американски Држави (САД) завршува денеска, соопшти администрацијата на американскиот претседател Доналд Трамп, која остава шестмесечен преоден период во кој испраќачите ќе можат да изберат фиксна царинска царинска стапка од 80 до 200 долари по пакет.
Имено, како што пренесоа светските медиуми, Агенцијата за царинска и гранична заштита на САД (ЦБП) ќе почне да наплаќа нормални царини за сите увозни пакети од целиот свет, без оглед на вредноста. Овој потег го проширува отстранувањето на ослободувањето „de minimis“ за пратки од Кина и Хонгконг, кое администрацијата на Трамп го воведе претходно оваа година.
„Елиминирањето на смртоносната дупка во законот ‘de minimis’ од страна на Трамп ќе спаси илјадници американски животи со ограничување на протокот на наркотици и друга опасна шверцувана стока и ќе донесе годишни царински приходи до 10 милијарди долари. Станува збор за трајна промена“,
изјави советникот за трговија на Белата куќа, Питер Наваро.
Советникот во изјавата за медиумите додаде и дека секој обид за обновување на ослободувањето од царини за сигурни трговски партнери е осудено на неуспех.
Инаку, ослободувањето од царини т.н. „de minimus“ е во сила од 1938 година, а во 2015 година беше зголемено од 200 на 800 американски долари, со цел да се поттикне растот на малите бизниси на платформите за трговија преку интернет.
Директните пратки од Кина се зголемија откако американскиот претседател Трамп ги зголеми царините за кинески стоки за време на неговиот прв мандат дозволувајќи им на компаниите за е-трговија како „Шејн“ и „Тему“да испорачуваат стоки директно до потрошувачите. Со тоа, многу пратки влегоа во земјата без инспекција, а администрацијата на Трамп обвини дека ослободувањето од царини за партките под 800 долари го зголемува протокот на фентанил во Соединетите Американски Држави.
Агенцијата за царинска и гранична заштита на САД објави дека бројот на пратки со ослободување од „de minimis“ се зголемил од 139 милиони во 2015 година на 1,36 милијарди долари во 2024 година. Откако ова ослободување на 2 мај беше укинато за пратките од Кина и Хонгконг, според податоците, Агенцијата собрала повеќе од 492 милиони долари дополнителни давачки за пратките.
Друг висок функционер на Белата куќа изјави дека целосните царински стапки ќе важат за сите пакети испратени преку компаниите за брзи пратки како што се „Федекс“, „Јунајтед парсел срвис“ (United Parcel Service) и ДХЛ (DHL), кои ќе ги собираат давачките и ќе ја обработуваат документацијата.
Странските поштенски агенции, како што пишуваат медиумите, можат да изберат да наплаќаат и обработуваат давачки врз основа на вредноста на содржината на пакетот или да се одлучат за метод на фиксна стапка со наплата на фиксен данок врз основа на „реципрочните“ царински стапки на Трамп што во моментов се во сила за стоки од земјата на потекло.
Според упатствата на Агенцијата за царинска и гранична заштита на САД објавени вчера, 80 долари ќе се наплаќа за пратките од земјите за кои администрацијата на Трамп воведе царински стапки под 16 проценти, како што се Обединетото Кралство и Европската Унија, 160 долари за пакетите од земјите со царини помеѓу 16 и 25 проценти, како што се Индонезија и Виетнам и 200 долари од земјите над 25 проценти, меѓу кои се Кина, Бразил, Индија и Канада.
Сепак, поштенските услуги мора да преминат на целосни тарифи „ad valorem“ врз основа на вредноста на пратките до 28 февруари 2026 година, изјави друг функционер.
Според него, некои странски поштенски услуги ја суспендирале доставата на пошта во Соединетите Американски Држави, но рече дека администрацијата работи со странски партнери и Поштенската служба на САД за да се минимизираат прекините.