САД немаат никаква врска со никаков заговор за соборување на белорускиот претседател Александар Лукашенко, соопштиле од Стејт департментот, за руската новинска агенција ТАСС.
„Видовме извештаи во руските државни медиуми за наводен заговор против Александар Лукашенко, како и неговите наводи за ова прашање во медиумитe. Секоја сугестија дека американската влада стои зад ова или е вклучена во обид за атентат врз Лукашенко е апсолутна лага“
соопштиле од Стејт департментот за ТАСС.
Во врска со притворот на адвокатот со двојно белоруско/американско државјанство Јуриј Зенкович, осомничен за соучесништво во наводниот планиран обид за атентат врз Лукашенко, портпаролот на американскиот Стејт департмент појаснил дека Вашингтон е подготвен да им обезбеди конзуларна помош на своите граѓани.
Белорускиот претседател Александар Лукашенко синоќа изјави дека спречил обид за државен удар и обид за атентат врз него и неговото семејство, кои ги планирале САД. Белоруската безбедносна служба соопшти дека во специјална операција растурила организирана терористичка група која планирала физичка елиминација на претседателот и неговото семејство и организирање вооружен бунт за насилно преземање на власта.
Според Лукашенко, Руската служба за безбедност (ФСБ) уапсила двајца белоруски државјани во Москва, и тоа политикологот Александар Федута и адвокатот Јуриј Зенкович, кој има и американско државјанство.
„Ја приведовме групата, тие ни покажаа како сè испланирале, јас занемев. Тогаш откривме дека тоа е работа на разузнавачки служби, кои јасно се странски, најверојатно ЦИА и ФБИ“, рече Лукашенко во видеото објавено од претседателството.