Техничката поддршка ќе биде наменета за зајакнување на дигиталната инфраструктура на институциите во земјава, а финансиската ќе биде насочена кон развој на киберкапацитети и унапредување на заштитата на одбранбената инфраструктура
Во рамки на стратешкиот дијалог со Соединетите Американски, Северна Македонија ќе добие техничка и финансиска поддршка за зајакнување на кибербезбедноста и дигиталната инфраструктура, соопштија денеска од Министерството за дигитална трансформација.
Техничката поддршка ќе биде наменета за зајакнување на дигиталната инфраструктура на институциите во земјава.
„Во рамки на ова, ќе бидат спроведени сеопфатни проценки на кибербезбедноста на критичната инфраструктура и други важни мрежи, со цел идентификација на ранливости, препорака на конкретни мерки за нивно отстранување, поддршка при носење одлуки за набавка на современи и доверливи кибербезбедносни решенија“,
велат од Министерството за дигитална трансформација.
Финансиската поддршка, пак, која ќе биде во износ од 5 милиони долари, ќе биде насочена кон развој на киберкапацитети и унапредување на заштитата на одбранбената инфраструктура.
„Дополнително, предвидено е ангажирање на киберсоветници, кои веќе се во контакт со Министерството за дигитална трансформација и Министерството за одбрана, со цел зајакнување на националните капацитети за киберодбрана, подобрување на оперативната подготвеност и зголемување на отпорноста на институциите“,
соопштија од ресорното министерство.
Оттаму посочуваат дека сите најавени активности се во целост усогласени со националните приоритети за дигитална трансформација и кибербезбедност, вклучително и имплементацијата на Националната стратегија за кибербезбедност 2025–2028, како и усогласувањето со европските стандарди.