„Ова значи дека Нафтената индустрија на Србија и Рафинеријата ќе продолжат да работат, со што се купува дополнително време за нашите граѓани, за земјата и економијата“, објави претседателката на српскиот парламент Ана Брнабиќ
Канцеларијата за контрола на странски средства при Министерството за финансии на САД ја продолжи лиценцата за работа на Нафтената индустрија на Србија (НИС) до 20 февруари.
„Ова значи дека Нафтената индустрија на Србија и Рафинеријата ќе продолжат да работат, со што се купува дополнително време за нашите граѓани, за земјата и економијата“,
изјави претседателката на српскиот парламент Ана Брнабиќ.
Во писмо до српското Министерство за финансии, САД наведуваат дека условите под кои лиценцата за работа е важечка се – трансакциите да не вклучуваат американски субјекти или американски финансиски систем и да не вклучуваат, да не се во име или за корист, директно или индиректно на кој било блокиран субјект освен НИС. Услов е и трансакциите да не вклучуваат никаква друга активност што е предмет на санкции во согласност со Правилникот за санкции поради штетните активности на Русија во областа на надворешната политика.
Претходната лиценца за продолжување на работата, која НИС ја доби пред три недели, истекува на полноќ.
НИС моментално е под санкции на САД поради мнозинско руско сопствеништво, а за да се укинат санкциите, американската администрација бара излез на Русија од сопствеништвото.
Унгарската компанија МОЛ на 19 јануари потврди дека ги потпишала главните одредби од обврзувачкиот рамковен договор со рускиот „Газпромнефт“ за купување на 56,15 проценти од акциите на НИС. Во меѓувреме, српската министерка за рударство и енергетика Дубравка Ѓедовиќ Хандановиќ објави дека НИС поднел барање до САД за продолжување на лиценцата за работа, додека преговорите за ова прашање се во тек.