Во заедничко соопштение, амбасадите на САД, Франција, Германија, Британија и Италија во Приштина ги демантираа информациите што се појавија во медиумите дека ќе помогнат во процесот на формирање на косовската влада. Се шпекулираше дека нивни претставници ќе учествуваат на разговорите меѓу мандатарот Албин Курти и неговиот потенцијален партнер во владата, Иса Мустафа.
„Претставуваме држави кои се длабоко посветени на демократијата и на независноста на Косово. Секоја сугестија од нашите влади со која ќе се изрази поддршка за некоја партија или кандидат е некоректна. Одговорноста за иднината на Косово, за тоа кој ќе го предводи им припаѓа само на граѓаните, на луѓето што живеат во Косово. Ние нема да се впуштиме во медијација, но ги охрабруваме сите политички актери да се фокусираат на исполнување на барањата на граѓаните на Косово“,
пишува во соопштението.
Инаку, за денеска е закажано продолжение на преговорите меѓу Движењето Самоопределување и Демократскиот сојуз на Косово во обид да се постигне договор за формирање заедничка влада.
Партиите не можат да најдат заеднички јазик поради поделбата на функциите. Партијата на Мустафа бара таа го предложи собранискиот спикер, да има пет министерства и да добие поддршка од партијата на Курти за кандидат за шеф на државата на наредните претседателски избори.