САД ги известија ОН дека Трамп сака договор за завршување на војната во Украина до 8 август

Американскиот претседател изјави дека почнувајќи од 29 јули, Русија има 10 дена да ја заврши војанта во Украина, а доколку не го стори тоа ќе се соочи со санкции од САД

Американскиот претседател Доналд Трамп јасно стави до знаење дека сака договор за завршување на војната на Русија во Украина до 8 август. Ова денеска го изјави високиот американски дипломат Џон Кели пред 15-члениот Совет за безбедност на Обединетите нации, пренесувајќи го официјалниот став на Вашингтон.

„И Русија и Украина мора да преговараат за прекин на огнот и траен мир. Време е да се постигне договор. Претседателот Трамп јасно стави до знаење дека ова мора да се направи до 8 август. САД се подготвени да спроведат дополнителни мерки за обезбедување мир“,

изјави високиот американски дипломат пред Советот за безбедност на ОН.

Трамп во вторникот изјави дека почнувајќи од 29 јули, Русија има 10 дена да ја заврши војанта во Украина, што би значело дека крајниот рок по однос на ова прашање истекува на 8 август. Доколку Русија не го стори тоа, како што најави, ќе се соочи со санкции од Соединетите Американски Држави.

• Трамп: Русија ќе се соочи со санкции од САД ако за 10 дена од денеска не ја заврши војната во Украина

Киев и Москва одржаа три рунди директни преговори во Истанбул кои резултираа со размена на затвореници, но без конкретни поместувања во разговорите за окончување на војната која трае повеќе од три години.