Има договор за отворање повеќе гранични премини меѓу двете земји и за тоа како ќе се развива транспортниот коридор што ги поврзува Солун, Софија, Видин, Арад и Централна Европа
Бугарскиот и грчкиот министер за транспорт, Николај Сабев и Константинос Караманлис, на работната средба во Софија денеска најавија дека нивните земји ќе вложат максимални напори за подобрување на транспортното поврзување меѓу двете земји.
Според Сабев, има договор за отворање повеќе гранични премини меѓу Бугарија и Грција, како и договор за поврзување на Јонското со Црното Море и како ќе се развива транспортниот коридор што ги поврзува Солун, Софија, Видин, Арад и Централна Европа.
Сабев соопшти дека грчката страна најавила намера годинава да го отвори граничниот премин кај Златоград, каде што грчките власти сè уште не пропуштаат возила и граѓани поради ограничувањата наметнати од ковид-19. Заедно со него, и натаму е затворен и граничниот премин на бугарско-грчката граница кај Ивајловград.
Тој додаде дека двете соседни земји ќе работат и на развој на железничкиот транспорт меѓу нив.
Според него, Бугарија и Грција отвораат нова страница во транспортните односи.
Бугарија има намера да купи 20 отсто од пристаништето Александропулис.