Санкциите што ги има воведено земјава, а се усогласени со ЕУ, се за четири руски официјални лица, кои Унијата смета дека се одговорни за кршење на човековите права во врска со Навални. Листата е дополнета со уште единаесет физички лица и четири фирми од Кина, Демократска Народна Република Кореја, Либија, Еритреја, Јужен Судан и Русија
Многубројни земји се приклучија во новиот пакет санкции на Европската Унија (ЕУ) кон Русија поради апсењето на рускиот опозиционер Алексеј Навални. Меѓу нив се и Северна Македонија, Црна Гора и Албанија.
Оваа вест деновиве ја пренесоа дел од руските и медиумите во регионот, а од Министерството за надворешни работи (МНР) велат дека намерата е да се усогласиме со надворешната и безбедноста политика на ЕУ како земја кандидат за членство.
Во санкциите кон Русија се придружиле и Украина, Исланд, Лихтенштајн и Норвешка.
„Овие земји ќе осигурат нивните национални политики да бидат во склоп со одлуките на Советот на ЕУ. ЕУ ја цени нивната одлука и ја поздравува“,
наведува во соопштение шефот на европската дипломатија, Жозеп Борел, пренесе „Спутник“ пред два дена.
Станува збор за механизам за Европски глобален режим за санкции за сериозни прекршувања и злоупотреба на човековите права во светот, кој Советот на ЕУ го воспостави во декември 2020 година, а кон него се придружи и Северна Македонија.
Овој механизам на ЕУ првпат беше активиран на 2 март и повторно на 22 март, проширувајќи ја црната листа за физички и правни лица и од други земји, покрај од Русија. Северна Македонија се приклучи кон санкциите и на почетокот на март, а истото го направила и изминатите денови откако по вторпат беше активиран механизмот.
„Механизмот првпат беше употребен на почетокот на 2 март оваа година, кога беа воведени рестриктивни мерки кои се однесуваат на четири руски официјални лица кои ЕУ ги смета за одговорни во однос на сериозно кршење на човековите права, а Северна Македонија се придружи кон овие рестриктивните мерки: соодветно и на претходните декларации на ЕУ за осуда во случајот на Навални, на кои се имаме придружено. На 22 март ЕУ повторно го активираше механизмот во врска со загриженост за сериозни кршења и злоупотреби на човековите права во различни делови на светот, како што се тортурата, вонсудски егзекуции, присилно исчезнување или систематска употреба на присилна работа извршена од физички и правни лица во Кина, Демократска Народна Република Кореја, Либија, Еритреја, Јужен Судан и Русија. Во овој контекст во листата под рестриктивни мерки дополнително беа внесени 11 физички и 4 правни лица. Следејќи ги активностите по ова прашање во континуитет, Северна Македонија се придружи и кон овие рестриктивни мерки на ЕУ“,
велат од МНР.
Како земја кандидат, за која веќе има донесено одлука за почеток на преговорите за членство во Унијата, посочуваат од Министерството, целта е да се постигне усогласеност од 100 проценти во надворешната и безбедносна политика со ЕУ.
„Степенот на усогласеност на Северна Македонија во моментот изнесува од 94 отсто, со тенденција во наредниот период да се постигне и 100 проценти усогласеност“,
велат од МНР.
Од руското МНР, пак, како што пренесуваат медиумите, вчера имало реакција. Според изјавите на портпаролката на Министерството, Марија Захарова, Русија не била изненадена што Северна Македонија и Црна Гора решиле да се приклучат кон последните санкции од ЕУ.
„И од Скопје, а од неодамна и од Подгорица, нè уверуваат дека се спремни да ги развиваат и зајакнуваат односите, а во црногорскиот случај да ги обновуваат по повеќегодишната деградација. Тие зборуваат дека се спремни да ги создадат сите потребни услови за тоа, воедно обидувајќи се да објаснат зошто претходно морале така. Се повикуваат дека мораат да ги следат политиките на ЕУ затоа што сакаат да влезат во ЕУ. Со други зборови, механички поддржуваат одлуки во чие носење не ни учествувале“,
изјавила Захарова, пренесува рускиот медиум „Спутник“ на српски јазик.
Механизмот за воведување санкции беше воспоставен на почетокот на декември 2020 година, со цел да му се овозможи на блокот од 27 земји во ЕУ да воведува санкции за прекршителите на човекови права. Како што беше соопштено тогаш од Унијата, првпат се овозможува да бидат посочени поединци, субјекти и тела (државни и недржавни чинители) кои се поврзани со сериозно кршење и злоупотреби на човековите права ширум светот.
„Ограничувачките мерки ќе предвидат забрана за патување на физички лица и замрзнување на имот на физички и правни лица“,
соопштија тогаш од ЕУ.
Со одлуката за воспоставување на овој механизам, посочија, се потврдува дека унапредувањето и заштитата на човековите права се темел и приоритет во надворешната политика на ЕУ и дека тоа ја одразува одлучноста на Унијата да се справи со сериозните кршења на човековите права.