Заев информира дека, за таа цел, Владата ќе обезбеди сместување, при што трошоците за време на престојот на бегалците, до трајната дестинација, целосно би биле покриени од САД
Поранешната американска државна секретарка Медлин Олбрајт ја наброи и нашата земја меѓу државите на кои им се заблагодари затоа што понудиле засолниште, покрај Канада, Албанија и Косово
Македонската Влада им се понудила на САД да прифати цивили од Авганистан, како што потврди денеска и премиерот Зоран Заев. Тој изјави дека ги информирале САД дека властите стојат на располагање да помогнат со бегалците.
„Авганистан се соочува со можна хуманитарна катастрофа и затоа ние како Влада, ги информиравме нашите стратешки партнери САД дека стоиме на располагање да помогнеме согласно нашите капацитети и потребите. Со цел да се спасат животите на локалното население, информиравме дека сме подготвени да преземеме и прифатиме цивилно население од Авганистан, кое изминативе 20 години работеше на мирот во таа земја, беше локална поддршка на сојузничките НАТО-сили, вклучително и на нашата армија, како и преземање и прифаќање активисти од демократските хуманитарни организации и од организациите за човекови права во Авганистан“,
изјави Заев на новинарско прашање околу тоа дали бегалци од Авганистан ќе бидат сместени во Северна Македонија и дали има некое барање од САД.
Тој порача дека за таа цел ќе обезбедат сместување, при што трошоците за време на престојот на бегалците, до трајната дестинација, целосно би биле покриени од САД.
„Ние сме солидарна земја, нашиот народ и нашето општество секогаш давале поддршка и помош исто како што сме добивале помош при огромни катастрофи“,
посочи Заев.
Поранешната државна секретарка на САД, Медлин Олбрајт денеска, во објава на Твитер, ја наброи и нашата земја меѓу државите, на кои им се заблагодари затоа што понудиле засолниште на, како што вели, авганистанските сојузници.
„Сега треба да се фокусираме на спасување животи во Авганистан. Додека САД работата на евакуација на лицата со посебен ризик од Талибанците, јасум благодарна на Албанија, Канада, Косово и на Северна Македонија што им понудија засолниште на авганистанските сојузници, на жените и на лидерите на граѓанското оптество. Се надевам и очекувам да ги следат и другите“,
напиша Олбрајт.
We must focus on saving lives in Afghanistan. As the US works to evacuate those at special risk from the Taliban, I am grateful to Albania, Canada, Kosovo and North Macedonia for offering refuge to Afghan allies, esp women & civil society leaders. I hope & expect others to follow
— Madeleine Albright (@madeleine) August 15, 2021