„Ова е историски момент, затоа што 70. годишнина на НАТО се одбележува со 30 земји членки“, изјави денеска премиерот Зоран Заев пред почетокот на лидерскиот состанок на земјите членки на НАТО во Лондон, на кој првпат нашата земја активно учествува како и останатите земји членки.
Иако земјава официјално не е примена, нашето знаме веќе се вее заедно со сите други 29 земји членки на Алијансата, а премиерот Заев ќе присуствува на целиот состанок, за разлика од минатата година.
Во завршната декларација од Самитот предвидено е во посебен параграф да биде забележано дека земјава е добредојдена како 30. членка на НАТО.
Од полноправното членство во НАТО, Северна Македонија ја дели само една ратификација – од Шпанија, каде што неодамна се одржаа парламентарни избори и во тек се разговори за формирање влада. Ратификацијата се очекува во наредните два месеца.
Џејмс Апатураи, заменик-помошник на генералниот секретар на НАТО за политички прашања, неодамна во интервју за Радио Слободна Европа рече дека на лидерскиот состанок на НАТО во Лондон на сите ќе им биде јасно дека Северна Македонија е на самиот праг, а нивните очекувања се дека рано напролет земјата ќе биде и членка на Алијансата.
НАТО на денешниот самит во Лондон одбележува седумдесет години од своето постоење. Иако овој самит требаше да биде главно церемонијален, тензиите помеѓу САД, Франција и Турција околу односот кон Русија, буџетскиот придонес кон Алијансата, прашањето на курдските воени групи во Ирак и Сирија и борбата против тероризмот, несомнено ќе доминираат во денешните расправи.
Изјавите на францускиот претседател Емануел Макрон за британскиот неделник „Економист“ предизвикаа бура негативни реакции во Источна Европа и Германија, главно поради алузиите за приближување кон Русија, како и проценката за „мозочната смрт“ на Алијансата.
На големо разочарување на членките на Алијансата, Макрон ова го кажа и вчера во пресрет на самитот.
– И натаму така мислам – рече Макрон на заедничката прес-конференција со американскиот претседател Доналд Трамп.