И јас и Ципрас сме свесни дека ги ставивме нашите политички кариери во ризик, но цврстата определба и верба во иднината не водеше низ процесот, рече Заев за потпишувањето на Преспанскиот договор, на денешното доделување на мировната награда на Вестфалија
Брисел има обврска и мора да го поддржи Договорот од Преспа во целост и да ги испорача ветувањата, како што Северна Македонија ги испорача сите свои обврски поврзани со процесот за интеграцијата во ЕУ, истакна поранешниот грчки премиер Алексис Ципрас, на церемонијата во Мунстер, Германија, на која нему и на македонскиот премиер Зоран Заев им беше врачена Меѓународна награда за мир на Вестфалија за 2020 година.
Ципрас истакна дека Меѓународната награда за мир на Вестфалија, што ја дели со Заев е награда за граѓаните на двете земји, кои сега соработуваат и заеднички инвестираат во иднината на регионот.
„Прашањето за соседските односи меѓу Северна Македонија и Грција беше отворено три децении. Поминавме три децении несигурност за нашата иднина. Три децении сериозна грижа за несакани последици. Три децении блокирани перспективи кои се од клучен стратешки интерес за нашата земја, за регионот и евроатлантските структури. Иднината беше идеја водилка во текот на целиот процес. Двете страни го прифатија компромисот како пријателство и грижа за интересите на вашиот политички партнер од другата страна, како и за вашите сопствени интереси“,
рече Заев, во обраќањето на церемонијата
Тоа пријателство, потенцира Заев, беше важно за да се создаде атмосфера во која отворено разговаравме за сите прашања, дури и кога се чинеше дека нема решение.
„Во текот на целиот процес, ние инсистиравме дека не зборуваме за црвени линии. Си кажавме дека црвените линии се ограничувачки. Црвените линии ве ставаат во кутија. Рековме – ние нема да го ставиме процесот во кутијата. Тоа е начинот на кој работат пријателите. Фокусирани на решенија. Градење мостови. Тоа е и суштината на Договорот од Преспа – пријателството! Со овој Договор, ставивме крај на спорот и на долготрајната разлика што крена ѕидови, што ги отежна соседските односи меѓу Северна Македонија и Грција“,
рече Заев.
И јас и Ципрас, додаде, сме целосно свесни дека ги ставивме нашите политички кариери во ризик, но цврстата определба и верба во иднината, како што наведе, не водеше низ процесот.
„Кога ќе видите од другата страна на масата за преговори личност која е фокусирана на решенија, личност со која ги делите истите политички вредности, тогаш ги имате сите потребни состојки за пријателски односи и атмосфера за да постигнете взаемно прифатливо решение за проблемот. Уште поважно, овој вид на поврзаност мотивира, се претвора во пријателство. И двајцата го вградивме ова пријателство во темелите на новиот однос помеѓу нашите земји. Тоа е најскапоцената придобивка“,
рече Заев.