Холандија не е против проширувањето на ЕУ и смета дека Северна Македонија е блиску до започнување преговори за членство, но Албанија се уште не е подготвена, изјави холандскиот премиер Марк Руте за подгоричка „Побједа“.
„Не веруваме дека Албанија во моментов е подготвена да ги почне преговорите со ЕУ. Што се однесува до Северна Македонија таа е поблиску до таа цел“, вели Руте.
Тој посочува дека на состанокот на Европскиот совет во Брисел, и покрај ваквата констатација за подготвеноста на двете земји, некои членки на Унијата не се согласиле процесот да биде раздвоен.
„За разлика од нив, одделни земји сакаа раздвојување и затоа на последниот Европски совет немаше одлука за прашањето за отворање преговори со овие две земји“, изјави Руте.
Прашан дали 2025 година е реален рок за прием на некоја од земјите од Западен Балкан во ЕУ, холандскиот премиер вели дека одредувањето крајни датуми не е цел сама по себе и оти најважно е да бидат исполнети условите.
„Немаме ништо против проширувањето на ЕУ, но мораме да се погрижиме да ги почитуваме правилата и целиот процес да биде строг и чесен. Тоа е нашата позиција“, изјави Марк Руте за подгоричка „Побједа“.
За планот на Европската Комисија чија крајна цел е почеток на преговори за членство со Северна Македонија и со Албанија во март следната година и временската рамка за идните чекори, повеќе прочитајте ТУКА.