Високата претставничка за надворешна политика и безбедност на Европската Унија најави и дека Русија ќе се соочи со нов бран економски санкции од Унијата
По масовните руски напади врз Киев во кои досега се потврдени 23 жртви, претежно цивили, остра осуда пристигна од високата претставничка за надворешна политика и безбедност на Европската Унија, Каја Калас. Таа вели оти овие напади се јасен показател дека Москва треба наскоро да биде соочена со нов бран економски санкции бидејќи изгледа дека она што го прави Владимир Путин значи дека тој нема намера да разговара за евентуално ставање крај на војната.
„Овие напади покажуваат дека Путин се потсмева на сите мировни напори што се прават“,
рече Калас.
Таа додаде оти новите санкции кои треба да бидат усвоени наскоро се насочени против руските енергетски извози и финансиски услуги и оти се очекува тие да имаат најсилен ефект. Паралелно со тоа, Калас смета оти земјите членки на Европската Унија треба да продолжат со снабдувањето на Киев со оружје бидејќи, како што кажа, на Украина во овој момент ѝ е потребна целата можна воена поддршка.
Претходно германскиот канцелар Фридрих Мерц рече дека по вчерашните ракетни напади не верува дека ќе се одржи предложената билатерална средба меѓу претседателите на Украина и Русија, Володимир Зеленски и Владимир Путин.