Руски напад со дронови врз повеќе региони во Украина

Гувернерот на Днепропетровск, Серхиј Лисак, пријавил штета на три високи згради во индустрискиот град Днепар, кој се наоѓа на југоистокот на земјата

Повеќе региони во Украина во текот на ноќта биле цел на руски борбени дронови, информираа украинските власти, пренесе ДПА.

„Серија експлозии можеа да се слушнат над Закарпатија“,
објави на платформата Телеграм, Свитлана Онишчук, гувернерка на регионот Ивано-Франковск во југозападна Украина.

Регионот се наоѓа на околу 850 километри од најблиските руски позиции на полуостровот Крим.

„Целта беше инфраструктурата. Пријавени се пожари, но нема повредени“,
рече Онишчук.

Гувернерот на Днепропетровск, Серхиј Лисак, пријавил штета на три високи згради во индустрискиот град Днепар, кој се наоѓа на југоистокот на земјата.

Украинските воздухопловни сили пријавија штета во регионот на Киев и во Суми на североисток, наведува агенцијата.

Воздухопловните сили објавија дека собориле 54 од повеќе од 100 дронa лансирани од Русија. Уште 39 беспилотни летала не носеле експлозиви и биле лансирани како мамки.

„Тие беа безопасни“,
соопшти украинското воено воздухопловство.

Во меѓувреме, во Москва, руското Министерство за одбрана објави дека пресретнале 32 украински беспилотни летала над руска територија, а 15 од нив биле регистрирани над јужниот регион Воронеж кој граничи со источна Украина.

Двете страни користат дронови и проектили за да ја напаѓаат клучната инфраструктура, вклучително и електраните, откако започна целосната руска инвазија пред речиси три години.

Руските сили извршија неколку обиди да заземат мали острови во устието на реката Днепар додека таа се влева во Црното Море во близина на Херсон во јужна Украина, објавија украинските медиуми.

Украинските сили одбиле вкупно 19 напади минатата недела, изјави за агенцијата поручникот Павло Дрохал, портпарол на украинските единици стационирани таму.