Јахтата била блокирана во пристаништето Трогир на барање на украинското обвинителство, кое го поврзува ова пловило со Виктор Медведчук, моќен руски тајкун против кого се води предистражна постапка во Украина, а чие движење „Втора Украина“ работи и во Србија
Рускиот бизнисмен Алексеј Инкин ја тужи Хрватска од која бара да му плати отштета од повеќе од 35 милиони евра поради заплена на неговата луксузна јахта „Ројал романс“.
Јахтата била блокирана во пристаништето Трогир на барање на украинското обвинителство, кое го поврзува ова пловило со Виктор Медведчук, моќен руски тајкун против кого се води предистражна постапка во Украина, а чие движење „Втора Украина“ работи и во Србија.
Хрватските медиуми го опишуваат овој случај како сложен процес, за кој досега во јавноста имало многу двосмислени и непотврдени информации.
Се шпекулирало дека бродот е блокиран поради меѓународните санкции наметнати на Русија по нападот на Украина.
Сепак, адвокатите на Инкин тврдат дека јахтата била задржана во Хрватска како дел од постапката против Медведчук.
Според адвокатите, украинското обвинителство го обвинува Медведчук за велепредавство, односно за склучување скапи договори за набавка на јаглен уште во 2015 година. Иако оваа истрага трае од 2016 година, судењето сè уште не е одржано, а во 2022 година украинското обвинителство издало барање за блокирање на луксузната јахта која повеќе не е на Медведчук, туку на Инкин.
Јахтата е закотвена во пристаништето Трогир речиси две години, а Инкин смета дека Хрватска немала причина да го заплени неговиот луксузен брод.
Тој проценува дека за овие две години бил оштетен за повеќе од 35 милиони евра бидејќи незаконски му бил замрзнат имотот.
Јахтата, чија вредност сè проценува на околу 130 милиони евра, морал да ја одржува, да плати за закотвување во марината во Трогир, а не можел бидејќи планирал да заработи со издавање.
Затоа, според неговите адвокати, трошокот надминал 35 милиони евра, што Инкин го навел во тужбата против Хрватска.
Спорот за сопственоста на јахтата продолжува пред судот во Сплит кој, како што пренесуваат хрватските медиуми, во неколку наврати се обидел да добие релевантни информации за целиот случај од Украина.
Сепак, пред неколку дена сплитскиот суд одлучил да ја продолжи мерката за конфискација на јахтата од компанијата на Инкин, која е формален сопственик, и да ѝ ја предаде на Арма, украинската агенција за управување со имотот стекнат со корупција и други кривични дела. Сепак, оваа одлука сè уште не е конечна, па јахтата сè уште не е предадена на украинските власти.
Инаку, јахтата „Ројал романс“ со знамето на Кајманските Острови е блокирана во пристаништето во Трогир од мај 2022 година врз основа на одлуката на Жупанискиот суд во Сплит. Таа била запрена во Риека, а потоа пренесена во Трогир. Поранешниот сопственик на луксузниот брод, Медведчук, бил украински олигарх и личен пријател на Владимир Путин. По агресијата врз Украина, тој се сокрил во Киев, но на крајот бил обвинет за велепредавство поради бизнисот со јаглен.
Тој беше разменет за група украински затвореници и сега живее во Русија, иако постапката против него, поради економски малверзации, трае повеќе од седум години во Украина.
Јахтата формално била во сопственост на сопругата на Медведчук, односно нејзината компанија. Украинските власти веруваат дека Инкин ја купил за да спаси дел од имотот на Медведчук од конфискација. Во исто време, како што произлегува од моментално достапните информации во судското досие, украинското обвинителство тврди дека Инкин ја крие јахтата на Медведчук.
Доколку јахтата ѝ биде предадена на Украина, адвокатите на Инкин најавуваат дека ќе ја дополнат тужбата кон Хрватска со целата сума од нејзината вредност од 130 милиони евра.