Инцидентот се случува откако Русија минатиот месец се повлече од договорот за жито, кој беше постигнат со посредство на Обединетите нации и Турција, а кој ѝ овозможуваше на Украина извоз на земјоделски производи преку морски пат. Москва соопшти дека сите бродови што пловат кон украинските пристаништа ќе ги смета како потенцијални транспортери на оружје за Украина
Руски воен брод вчера испука предупредувачки истрели кон товарен брод во југозападниот дел на Црното Море кој се движел кон север. Ова, како што пишува „Гардијан“, е првпат Русија да пука врз трговски брод надвор од Украина, откако Москва минатиот месец се повлече од договорот за жито, кој беше постигнат со посредство на Обединетите нации и Турција.
Имено, минатиот месец, го суспендира учеството во договорот за жито преку Црното Море, што ѝ овозможиуваше на Украина да извезува земјоделски производи преку морски пат.
Според соопштението, Москва смета дека сите бродови што се движат кон Украина потенцијално носат оружје за украинската војска.
Вчера , Русија соопшти дека нејзиниот патролен брод „Васили Биков“ пукал со автоматско оружје врз бродот „Сукру Окан“, кој пловел под знамето на Палау, откако капетанот на бродот не одговорил на барањето да го запре бродот за инспекција.
Бродот, според властите во Москва, се движел кон украинското пристаниште Измаил.
„За принудно запирање на бродот, беше отворен предупредувачки оган од автоматско оружје“,
соопшти руското Министерство за одбрана.
Руски војници се качиле на бродот со помош на хеликоптер од типот Ка-29, соопшти руското министерство.
„Откако инспекциската група ја заврши својата работа на бродот, ‘Сукру Окан’ го продолжи својот пат кон пристаништето Измаил“,
соопштија руските власти.
Официјален претставник на турското министерство за одбрана изјави дека бил информиран за инцидентот и дека Анкара го истражува случајот.
Висок советник на украинскиот претседател Володимир Зеленски рече дека инцидентот е „јасно кршење на меѓународното право за морска пловидба, пиратско дело и злосторство против цивилни бродови на трета земја во водите на други држави“.
Советникот Михаило Подољак на Твитер напиша дека „Украина ќе ги извлече сите потребни заклучоци и ќе го избере најдобриот можен одговор“.
Инаку, украинскиот претседател Зеленски не го спомна инцидентот во своето редовно ноќно видеообраќање.
Портпаролката на јужната воена команда на украинските сили Наталија Хумениук изјави дека руските наводи не се потврдени од други официјални извори.
„Верувам дека треба да се обрне внимание на ова и треба да се имаат на ум особеностите на хибридната војна“,
рече таа во телевизиско обраќање.
Според неа, овој инцидент може да биде порака за сите цивилни бродови во Црното Море, повикувајќи целиот транспрот и пловидба во ова море да се спроведуваат под меѓународни гаранции.
Русија, додаде таа, се обидува да го потврди своето право да запре брод или да распореди авиони во Црното Море и „да нема никакви последици“.
Пукањето на трговски брод, пишува Гардијан, коментирајќи го инцидентот, ќе ја зголеми веќе акутна загриженост кај бродарите, осигурителните компании и трговците со стоки за потенцијалните опасности во Црното Море – главната рута што ја користат Украина и Русија за да ги изнесат своите земјоделски производи на меѓународниот пазар.
Русија и Украина се меѓу водечките производители на земјоделски производи во светот и главните играчи на пазарите на пченица, јачмен, пченка, семе од репка, масло од репка, семки од сончоглед и сончогледово масло. Русија е доминантна и на пазарот на вештачки ѓубрива.
Откако Русија го напушти Црноморскиот договор за жито, и Москва и Киев издадоа предупредувања и извршија напади што предизвикаа нервоза на светските пазари на стоки, нафта и бродови.
Русија соопшти дека ќе ги третира сите бродови што се приближуваат до украинските пристаништа како потенцијални воени бродови, а земјите кои пловат под одредено знаме како сојузници на Украина.
Украина одговори со слична закана за бродовите кои пловат до руските пристаништа. Претходно Украина нападна руски танкер за нафта и воен брод во нејзината поморска база Новоросијск, веднаш до големото пристаниште за жито и нафта.