Додека Киев инсистира на безусловно примирје за да се овозможат преговори за завршување на конфликтот, Русија се држи до своите максимални барања, вклучително и целосно повлекување на украинските трупи од источните региони нелегално анектирани од Москва
Руските и украинските преговарачи денеска ќе се сретнат на трета рунда разговори, иако се очекува мал напредок во завршувањето на тригодишната војна бидејќи позициите остануваат далеку одвоени.
Украинскиот претседател Володимир Зеленски ги намали очекувањата, велејќи дека деталните разговори за прекин на огнот не се на дневен ред.
„Денешната средба наместо тоа треба да се фокусира на напредокот во враќањето на украинските воени заробеници и децата киднапирани од Русија, како и на подготовката за состанок на претседателско ниво. Ни треба поголем импулс во преговорите за завршување на војната“,
им рече Зеленски на дипломатите во понеделникот објаснувајќи го своето инсистирање за средба со рускиот претседател Владимир Путин.
Москва, во меѓувреме, инсистираше на состанокот да се разговара за документи што содржат позиции за можни патишта кон мир, претходно разменети од завојуваните страни. Сепак, портпаролот на Кремљ Дмитриј Песков, исто така, рече дека постигнувањето договор за прекин на огнот ќе бара голема дипломатска работа.
Додека Киев инсистира на безусловно примирје за да се овозможат преговори за завршување на конфликтот, Русија се држи до своите максимални барања, вклучително и целосно повлекување на украинските трупи од источните региони нелегално анектирани од Москва.
Украина и Русија во мај започнаа директни разговори за првпат по повеќе од три години. Досега, разговорите резултираа со размена на воени заробеници, а неодамна беа ослободени војници под 25 години и тешко ранети борци.
Како што соопшти Кремљ, руската делегација повторно ќе ја предводи советникот на претседателот и поранешен министер за култура Владимир Медински.
Украинскиот тим ќе го предводи поранешниот министер за одбрана Рустем Умеров, кој оттогаш е назначен за шеф на Советот за национална безбедност и одбрана.