Амбасадата на Русија објави дека двата воени воздухоплова на САД кои вчера го надлетаа Скопје биле пресретнати од руски „сухои“ над Црно Море, со хаштаг: СтопНАТО
Реагираше Амбасадата на САД: Како и обично, си поигруваат со вистината и се обидуваат да го одвлечат вниманието од историското зачленување на Северна Македонија во НАТО – дури не користат ни вистински снимки или фотографии
Два воени воздухоплова на САД придружувани од четири авиони на военото воздухопловство на Република Грција вчера околу 11.30 часот извршија низок прелет над Скопје во чест на членството на Северна Македонија во НАТО. Авионите дојдоа од правец на скопскиот аеродром и го надлетаа главниот град долж реката Вардар.
По овој настан кој скопјани можеа лично да го посведочат, Амбасадата на Русија во земјава објави пораката на „Твитер“ во која пишува дека два руски авиони „сухои“ над Црно море пресретнале два американски авиони од воената база во Јужна Дакота, кои се движеле кон руската границата. Објавата е проследена со видео, фотографии и хаштаг „СтопНАТО“. Во прилог е постиран твитот на Амбасадата на САД за прелетот на двата американски бомбардера над Скопје.
На твитот на руската амбасада денеска реагираше Амбасадата на САД, исто така, на „Твитер“:
„Како и обично, си поигруваат со вистината и се обидуваат да го одвлечат вниманието од историското зачленување на Северна Македонија во НАТО – дури не користат ни вистински снимки или фотографии“,
одговори Амбасадата на САД во земјава.
Во твитот, Амбасадата на САД упатува на вест објавена од американските воздухопловни сили за Европа и Африка, за тоа што, всушност, се случило.
Што се случило?
Двата воени воздухоплова на САД – Б1 тргнале од воздушната база Елсворд во Јужна Дакота и имале долготраен лет во рамки на мисијата „Bomber Task Force“ низ Европа и воздушниот простор над Црно море. Во оваа мисија биле вклучени и украински и турски воени авиони.
„Ваквата мисија ја покажува посветеноста кон нашите сојузници и партнери и испраќа јасна порака за одвраќање на секој противник. Стратешкото присуство на нашите воени воздухоплови низ Европа покажува дека САД заедно со своите сојузници или партнери се подготвени да одвратат некого, а ако е потребно и да ги искористат заедничките способности“,
изјавил генералот на американските воздушни сили во Европа и командат на воздухопловните сили во Африка, Џеф Харигијан.
Дел од мисијата била и обука за интеграција со полски (Ф16 и МиГ-29) и романски авиони (ф-16 и МиГ-21), кои ги придружувале американските воздухоплови токму во регионот на Црно море.
За време на долгиот непрекинат лет од околу 30 часа, на американските авиони кои полетале од Јужна Дакота им било обезбедено полнење гориво во воздух од британски, турски и американски авиони.
Во рамки на оваа мисија, американските воздухоплови заедно со авиони од грчкото воздухопловство, прелетаа и над Скопје.
„Ваквите мисии им покажуваат на НАТО-сојузниците, вклучувајќи ја и најновата членка – Северна Македонија, дека на ваков начин се зголемува подготвеноста и се прави потребната обука за одговор на кој било предизвик“,
изјавил шефот на Европската команда на американските сили, генералот Тод Волтерс.