Портпаролот на руското Министерство за одбрана, Игор Конашенков, изјави дека цел на нападите вчеравечер и денеска наутро е воената инфраструктура на Украина. Нема потврда од украинска страна ниту од независни извори
Русија ја гаѓаше Украина со крстосувачки ракети од бродови во Црното и од Каспиското Море и лансираше суперсонични ракети од воздушниот простор на Крим, соопшти денеска руското Министерство за одбрана.
Портпаролот на руското Министерство за одбрана Игор Конашенков изјави дека цел на нападите во саботата навечер и денеска наутро е воената инфраструктура на Украина.
„Крстосувачки ракети ‘Калибар’ беа лансирани од Црното Море кон фабрика во градот Нижин, која ги поправа украинските оклопни возила оштетени во борбите“,
рече Конашенков.
Русија лансираше крстосувачки ракети „Калибар“ од Каспиското Море и суперсонични ракети „Кинжал“ од воздушниот простор на Крим за да го уништи складиштето за гориво што го користи украинската армија, додаде Конашенков.
Тоа е складиште за гориво во регионот на Николаев. Според Министерството, уништената цел била „главниот извор на гориво за украинските оклопни возила“ распоредени на југот на земјата.
Русија го погоди и украинскиот воен центар, во кој се сместени странски доброволци во регионот Житомир, 150 километри западно од Киев. Во нападот загинаа повеќе од 100 (украински) специјални сили и странски платеници, соопшти руското МО.
Засега нема потврда од украинска страна ниту од независни извори.