Украинскиот претседател Зеленски уште еднаш повика дека само силен притисок врз Русија може да го отвори патот кон дипломатско решение на конфликтот
Најмалку две лица загинале, а шест се повредени во воздушни напади што руските сили ноќеска ги извршиле врз главниот град на Украина, Киев, јавува Би-би-си повикувајќи се на украинската државна служба за вонредни ситуации.
Според извештаите, сирените за предупредување од воздушни напади во Киев се огласиле нешто пред полноќ, по што за кратко време одекнале неколку силни експлозии.
Тамошните власти велат дека дел од експлозиите биле звуци од руска балистичка ракета уништена од системите за противвоздушна одбрана.
Во меѓувреме, службата за вонредни ситуации соопшти дека дрон погодил станбена зграда, а фрагменти од дрон погодиле две други станбени згради. Остатоците од балистичката ракета, пак, предизвикале пожар што бил изгаснат околу 3 часот по локално време.
Фотографии од местото погодено од беспилотно летало покажуваат значителна штета на станбената зграда и екипи на службите за вонредни ситуации како изнесуваат вреќи за тела од неа.
Инаку, синоќешните напади врз Киев се случуваат само неколку часа пред почетокот на тридневното примирје што го најави рускиот претседател, Владимир Путин, поради прославата на Денот на победата во Втората светска војна на 9 мај.
Украина го отфрли ваквиот предлог, повикувајќи ја Русија да се согласи на многу посуштинско 30-дневно примирје и преговори.
Украинскиот претседател Володимир Зеленски утрово соопшти дека Русија ноќеска лансирала четири балистички ракети и 142 дронови кон неговата земја.
Според него, сè уште има десетици дронови што летаат над Украина. Изјави и дека во синоќешните напади се убиени две лица, а седум се повредени од кои четири деца.
„Трагично, една жена и нејзиниот син се убиени“,
рече Зеленски осврнувајќи се на нападите во Киев.
Тој соопшти дека службите за итни случаи се распоредени низ целата земја – вклучувајќи ги регионите Запорожје, Донецк, Житомир, Херсон и Днепар.
Зеленски уште еднаш повика дека само силен притисок врз Русија може да го отвори патот кон дипломатско решение на конфликтот.
„Само значително засилен притисок врз Русија и построгите санкции можат да го отворат патот кон дипломатијата. Москва мора да биде одговорна за своите постапки“,
рече Зеленски.
Во меѓувреме, украинските сили истрелаа беспилотни летала кон Москва, што ги принудите руските власти да ги затворат аеродромите во земјата втора ноќ по ред.
Во украинските напади врз Москва, кои се случуваат додека во градот пристигнуваат делегации и лидери за прославата на Денот на победата, досега не се пријавени жртви и материјални штети.