Како оправдување за промената, руското Министерство за одбрана рече дека претходните советски мерења на границата во 1985 година користеле наутички карти од средината на 20 век и затоа не соодветствуваат целосно на посовремените картографски координати
Руското Министерство за одбрана предложи ревизија на границите на руските територијални води во Балтичкото Море, според предлог-владината одлука, што предизвика огорченост кај Финска, членка на НАТО-алијансата.
Според предлог-одлуката од 21 мај, Министерството предложи промена на границата околу руските острови во источниот дел на Финскиот Залив и околу Калининград.
„Преминувањето на државната граница на Руската Федерација на море ќе се промени“,
стои во резимето на предлог-одлуката.
Доколку биде одобрена, одлуката ќе стапи во сила во јануари 2025 година.
Финска: Москва сее конфузија
Како оправдување за промената, Министерството за одбрана рече дека претходните советски мерења на границата во 1985 година користеле наутички карти од средината на 20 век и затоа не соодветствуваат целосно на посовремените картографски координати.
Врз основа на нацртот, не е јасно како точно би се менувала границата или дали имало разговори за тоа со други држави на Балтичкото Море.
„Финските власти ги истражуваат информациите во руските медиуми за разграничување на поморските зони во Финскиот Залив. Владата внимателно ја следи ситуацијата. Русија не е во контакт со Финска во врска со ова прашање. Финска дејствува како и секогаш: смирено и врз основа на фактите“,
изјави финскиот претседател Александар Стуб.
Финската министерка за надворешни работи Елина Валтонен изјави дека Русија треба да се придржува до Конвенцијата на Обединетите нации за морското право и додаде дека Москва сее конфузија.
Фото: Илустрација/EPA-EFE/VALDA KALNINA