Одлуката на бугарскиот претседател Софија да не учествува во европската набавка на 1 милион артилериски гранати за Украина, како и неговото одбивање на Киев да му прати оружје од советско производство, дел од бугарските медиуми го гледаат како негово „играње по руски ноти“.
Шефот на државата Румен Радев, кој е поранешен воен пилот, решението Бугарија да не се приклучи на повеќето членки на ЕУ во напорите за обезбедување муниција за Украина, по завршувањето на Европскиот совет во Брисел, го објасни како „придржување на неговата земја до европскиот механизам за мир“.
„Седумнаесет земји членки го поддржуваат договорот за обезбедување 1 милион проектили од 155 милиметри за Украина, а 10 земји не го поддржуваат. Бугарија не е меѓу земјите кои ќе нарачуваат проектили за Украина. Бугарија го поддржува европскиот механизам за градење мир. Со него ќе ја модернизираме нашата одбранбена индустрија за да ги исполниме современите барања за поголем капацитет. Но, во заклучокот за испорака на 1 милион гранати на Украина експлицитно стои дека тоа мора да се направи во согласност со специфичните карактеристики на безбедносната и одбранбената политика на секоја земја членка“,
изјави Радев во Брисел.
Некои бугарски медиуми овој чекор на Радев го толкуваат како уште еден показател дека тој е „промосковски“ ориентиран.
Бугарскиот претседател, засега, според пишувањата во Софија, ги игнорира и барањата на САД кои наводно предвидуваат модерни американски противвоздушни системи како замена за бугарските С-300 (од советско производство) кои би биле пратени во Украина.