Контроверзните изјави на Трамп за Газа беа тема и на брифингот со новинарите во Белата куќа, на кој портпаролката Керолин Левит рече дека претседателот не се обврзал да испрати американски војници во Појасот
Според американскиот државен секретар Марко Рубио, претседателот на САД, Доналд Трамп, предложил само привремено заминување на Палестинците од Газа, додека Појасот не биде расчистен и обновен, а не преземање на територијата од страна на Соединетите Американски Држави.
Американскиот претседател предизвика силни реакции ширум светот откако вчера на заедничката прес-конференција со израелскиот премиер Бенјамин Нетанјаху рече дека САД ќе го преземат Појасот Газа, а Палестинците кои живеат таму треба бидат преселени на друго место.
Трамп, во таа насока, изјави дека Газа може да стане „ривиера на Блискиот Исток“ и не ја исклучи можноста од испраќање американски војници за постигнување на таа цел.
Рубио, прашан за коментар на ваквите изјави на американскиот претседател, на прес-конференција во Гватемала Сити, денеска рече дека предлогот на Трамп не бил даден во непријателска смисла, пренесува „Гардијан“.
Според Рубио, палестинската територија наликува како место погодено од природна катастрофа и оти луѓето не можат да живеат таму бидејќи има неексплодирани средства, остатоци и урнатини.
„Единственото нешто што го направи претседателот Трамп – многу великодушно, според мене – е што понуди подготвеност на Соединетите Држави да интервенираат, да ги исчистат урнатините, да го исчистат местото од целото уништување на теренот, да го исчистат од сите тие неексплодирани убојни средства“,
рече Рубио.
Луѓето што живеат таму, додаде тој, не можат да бидат таму додека екипите ги расчистуваат урнатините.
„Трамп сака да поддржи обнова на домови и бизниси и работи од таа природа, за луѓето потоа да се вратат“,
рече американскиот државен секретар.
Контроверзните изјави на Трамп за Газа беа тема и на брифингот со новинарите во Белата куќа, на кој портпаролката Керолин Левит рече дека претседателот не се обврзал да испрати американски војници во Појасот.
Прашана дали Белата куќа може да ја исклучи можноста за испраќање американски војници во Газа, Левит изјави:
„Велам дека претседателот сè уште не се обврзал на тоа. Тој ја нема преземено таа обврска“
Министерот за одбрана на САД, Пит Хегсет, пак, изјави дека кога станува збор за Газа, Пентагон е подготвен да ги разгледа „сите опции“.
Хегсет го даде овој коментар денеска пред почетокот на неговиот состанок со израелскиот премиер Бенјамин Нетанјаху во Пентагон, пренесе Ројтерс.
„Само би кажал, дека кога е Газа во прашање, дефиниција за лудост е обидот истото да се одново и одново и одново… Претседателот е подготвен да размислува надвор од рамката, да бара нови и уникатни, динамични начини за решавање на проблемите за кои се чинеше дека се нерешливи. Подготвени сме да ги разгледаме сите опции“,
рече Хегсет.
Генералниот секретар на Обединетите нации, Антонио Гутереш, во своето обраќање пред Комитетот на ОН за остварување на неотуѓивите права на палестинскиот народ, предупреди дека потрагата по решенија не смее да го влошува проблемот.
Во таа насока Гутереш рече дека од витално значење е да се остане верен на основата на меѓународното право и оти е неопходно е да се избегне каква било форма на етничко чистење.
Тој рече дека секој траен мир ќе бара „опиплив, неповратен и постојан“ напредок кон решението за две држави, како и формирање „независна палестинска држава со Газа како нејзин составен дел“.